تختار ايه؟
في الحياة دايمًا لما بنتحط في موقف مواجهة مع الغير وقت الخصام بيبقى قدامنا طريق من الأتنين، يا نختار الرد الأقوى يا نختار الرد الأنسب والأفضل لكن يعني ايه الرد الأقوى ويعني ايه الرد الأنسب والأفضل؟
فين المعنى؟!
الرد القوي هو أنك ترد بنفس القوة وبنفس الطريقة من غير ما تفكر في المردود هيكون سلبي ولا إيجابي، هيكون يليق بيك كإنسان ربنا ساكن فيه؟ ولا هيكون رد طالع من قلب مبيعرفش يتواضع ولا يعرف يسيب حقه حتى لو كان في سبيل تجريح غيره؟.
أما الرد المناسب والأفضل هو لما ترد وأنت عارف أنك مبترميش شوك يجرح في قلب اللي قدامك حتى لو هو كان جارحك وآذيك، لأنك عارف أنك على صورة ربنا ومثاله، وأنك زي سيدك بتجول تصنع خير وأمام الشر مبتردش الشر لكن بترد بالخير وبالحب.
المعلم الجوهري
من المواقف الشهيرة للمعلم إبراهيم الجوهري الأرخن القبطي الفاضل كان بيتحكي أن أخوه المعلم جرجس مرة راح له يشتكي له من تاجر في السوق اتعامل معاه بطريقة مش ولابد وإتكلم كلام في حقه هو وأخوه بطريقة مش حلوة وكان طلب منه ياخد حقه ويتصرف معاه.
والمعلم إبراهيم وقتها وعده أنه هيقطع للراجل ده لسانه، وساب المعلم جرجس أخوه وهو بيفكر طول الوقت أن امتى وازاي المعلم إبراهيم هيقطع للراجل ده لسانه.
لكن الحقيقة أن المعلم إبراهيم بعت هدايا وخير كتير للشخص ده، واللي لما شاف المعلم جرجس بعد الهدايا دي وقف له واعتذرله قدام كل الناس وشكر فيه وفي أهله وأخوه بعد ما كان بيتهكم عليه بالكلام وبالألفاظ.
الرد الأفضل
وده كان الرد الأفضل والمناسب اللي رد بيه المعلم إبراهيم على الراجل، أنه رد بالمحبة وبالخير مش بالقسوة ولا استغلال النفوذ والسلطة، رغم أنه كان في منصب حلوة في الدولة وقتها، لكن هو فضل أنه يرد بالطريقة الصح واللي نشوف ربنا من خلالها ومن خلال الموقف.
علشان كده يا صديقي دايمًا في كل موقف تمر بيه في وقت خصام مع حد، حط قدامك الكتاب المقدس وهو بيقول: "اَلْجَوَابُ اللَّيِّنُ يَصْرِفُ الْغَضَبَ، وَالْكَلاَمُ الْمُوجعُ يُهَيِّجُ السَّخَطَ"، وافتكر أن سهل تجرح وتوجع غيرك، لكن الصعب هو أنك تكون بتحب حتى وقت الغضب وبتقدم المحبة.
سهل ترد بنفس طريقة الناس وطريقة العالم، لكن الصعب هو أنك تكون زي المسيح قادر تحب حتى اللي بيجرحوك وبيئذوا فيك، بس لما تقدر تحقق الصعب وتعمل المعادلة الأصعب اللي هي أنك تحب حتى وقت وجعك، ده اللي هيخليك تكسب في الآخر قلب اللي قدامك حتى لو مكانش فيه حب ليك.
Instagram: @PWagiih
