عمرو أديب: السيسي ضحى بكثير من شعبيته لصالح البلد.. واللي هيجي بعده هيكون سعيد
قال الإعلامي عمرو أديب: "الدولة في اليوم الأول للمؤتمر الاقتصادي قالت للناس تعالوا نفرجكوا الوضع عامل ازاي، وايه الحكاية والموضوع والدنيا كانت ازاي ومشيت ازاي ووصلت لإيه، وجابت للناس الوضع الاقتصادي من الثمانينات، وانا كنت سعيد بالمكاشفة والمصارحة".
مصارحة الدولة
وتابع خلال برنامج “الحكاية” المذاع علي قناة “ام بي سي مصر": "الحكومة قالت للناس أنا عمري ما كنت سويسرا ولا بريطانيا ولا ألمانيا ولكن حاولنا نجري في كل مكان لأن مصر الـ104 مليون امامها تحديات كبيرة ومشكلات وماَسي كثير في الصحة والتعليم والاقتصاد، ولكن اللى بستغربه أن البعض بيقول انت جاي تقولنا الحقيقة والصورة دي دلوقتي، ولكن انتوا عارفين الوضع كويس هو انتوا قاعدين معانا ولا في المريخ واللى حاصل في العالم من كورونا للحرب الروسية الأوكرانية
الدولة لا يجب أن تشكر على حاجة ولكن الحقيقة أنها قامت بدورها، في وقت كورونا".
إنجازات السيسي
ولفت: "الرئيس السيسي استلم من غير كهربا بقى فيه كهربا، استلم مكنش فيه غاز وبقى يصدر وحقق الاكتفاء الذاتي، الراجل استلم مكنش فيه شقق والناس عايشة في عشوائيات نقلهم لمكان اَدمي وقضى علي العشوائيات، هذا لا منة ولا فضل ولكن الراجل اشتغل وانجز".
الظروف العالمية الصعبة
وتابع: "لما اشتغل 7 او 8 سنين الطبيعي ان فيه حاجات اتعملت صح وحاجات متعملتش صح، والراجل قالك ده اللى قدرت اعمله، والدولة قدرت تعمله، تعالوا بقى شوفوا وضعنا النهاردة ونقابل التحديات الموجودة وسط الظروف العالمية الصعبة اللى قطموا وسط العالم مع مرورنا بثورتين وازمة كورونا والحرب الروسية الروسية الأوكرانية".
الأزمة الاقتصادية العالمية
ولفت: "النهاردة الدولة بتقولك انا بعمل اكتر حاجة علشان اعملك اللى انت عايزة من خدمات واحتياجات أساسية، وانا بقول احنا في مشكلة الدولة مش مسئولة عنها في الأزمة الاقتصادية العالمية بعد جائحة كورونا ومرورا بالحرب الروسية الأوكرانية، والحمد لله أن الأزمة اللى احنا فيها دي جت علشان احنا نقوم بإجراءات مفصلية والتعامل بواقعية مع الأمور وتحمل المواطن مسئولياته".
جائحة كورونا والحرب الروسية
وأكمل: "لو مكنتش جت الكورونا والحرب الروسية كنا هنبقى فين دلوقتي والحقيقة أن أرقامنا كانت ماشية كويسة في معدلات النمو وزيادة الصادرات وارتفاع إيرادات قناة السويس وانخفاض البطالة، وتحقيق طفرات في الزراعة والإنتاج، ودعم المصانع".
ابرز انجازات السيسي
وتابع:"مش عايزك تعمل لعبد الفتاح السيسي تمثال ولكنه أنجز في كثير من الملفات وأهمها الكهرباء، وتوسيع الدائري وتطوير الموانئ ومراكز الغاز المسال وتصدير الغاز لأوروبا، والقضاء علي فيروس سي، بعدم لما كان ربع المصريين عندهم فيروس سي، وكثير من المشاهير والفنانين كان عندهم فيروس سي، وصرفنا الفلوس في حاجات كتير جيدة جدا".
عرض رئيس الوزراء الذكي
وأكمل: "كان هناك عرضا ذكيا جدا من رئيس الوزراء في المؤتمر الاقتصادي، والنهاردة مفيش حد بيقف طابور في محطة بنزين، ولا بيتزاحم علشان انبوبة بوتاجاز، ولا بيقف في طابور عيش".
مهمة السيسي
وتابع: "عبد الفتاح السيسي في رقبته الفقراء وهذا هو قدر أي رئيس يأتي إلى مصر وهم أكثر من 60% من تعداد الشعب ولازم يخلى باله منهم ويعملهم عيش ويوفرلهم مدارس ومستشفيات وكل حاجة عايزينها".
طلب عمرو أديب
وأكمل: "انا سنين بطلب من الدولة تقول للناس ايه التحديات اللي موجودة لأن الدولة في احيانا كانت بتطير علشان تعمل مشروعات خدمية وبني تحتية".
ولفت: "أنا سعيد من جلسات المؤتمر الاقتصادي اليوم لأن الناس قد علمت تحدياتنا واحنا رايحين فيه ووضعنا عامل ازاي".
سبب تخلف مصر عن سنغافورة
ولفت:"البلد دي كانت ممكن تبقى سنغافورة لولا أن فيه موظف بيعطل الدنيا، البيروقراطية في مصر قاتلة، وتعطل حركة الاستثمار والإنتاج، البلد حلت كل حاجة من قضاء علي العشوائيات لحل ازمة الكهرباء، فاضل بس يكون فيه تسهيل لإجراءات الاستثمار واَن الأوان نزيل حجر العثرة اللى بيعطل الإنتاج".
شعبية السيسي
وأشار: "قدر السيسي ضحى بكثير من شعبيته من اجل صالح البلد مواجهة التحديات الاقتصادية والأزمات التي تعاني منها البلاد لسنوات طويلة، وقرر أن يمشي في برنامج الاصلاح الاقتصادي وهذا أمر تكرهه الشعوب، ولكن كلما كان الدواء مرا كان العلاج سريعا، وحل ازمة البنزين والكهرباء وكل الملفات الشائكة اللى هتخلى اللى يجي بعده هيكون سعيد بما تحقق".
