طول أناة
من ثمار الروح القدس اللي بتبقى في حياتنا كمؤمنين وهي ثمرة مهمة طول الأناة، واللي تبان إنها صعبة أننا نقدر نتحلى بيها، لكن لما بتبقى جوانا بتبقى ثمرة مفيدة من ثمار الروح القدس لينا ولحياتنا كمؤمنين.
يعني ايه طول الأناة؟
طول الأناة دي مش بس صبر أو تحمل قصاد التجارب أو المشاكل، دي قوة جوانا تخلينا نستحمل الدنيا بكل تقلباتها ومشاكلها، ولما بنقول قوة، فهي علشان بتعلمنا يعني ازاي نقدر نعيش حياتنا بإيمان وأمل، من غير ما نزعل أو نشتكي من الظروف، يعني بتدينا دافع وبتصنع فارق وعلشان كده بنوصفها بالقوة.
ما بين العهد القديم والجديد:
ولو رجعنا للعهد القديم قبل مجيء المسيح للعالم، هنلاقي أن كان فيه قاعدة "عين بعين، وسن بسن"، يعني الانتقام كان الناس بتتعامل بيه في حياتها اليومية وبتحاول تاخد حقوقها بكل شكل وبأي صورة مجرد ما حد يقرب منها أو يمسها.
لكن لما جه المسيح، علمنا حاجة تانية خالص. علمنا نكون وديعين ومتواضعين، ونسامح اللي يغلط في حقنا، وعلمنا أن حتى يعني لو حد ضربك على خدك، متردش الضربة، بالعكس، اديله الخد التاني كمان.
المسيح نفسه كان مثال لطول الأناة. زي ما الكتاب بيقول: "الَّذِي إِذْ شُتِمَ لَمْ يَكُنْ يَشْتِمُ عِوَضًا، وَإِذْ تَأَلَّمَ لَمْ يَكُنْ يُهَدِّدُ بَلْ كَانَ يُسَلِّمُ لِمَنْ يَقْضِي بِعَدْل" (1بط 2:23). وإحنا كمان مطلوب مننا نكون زيه، نتحلى بالصبر والهدوء، حتى لو الدنيا ضاقت علينا لأن كل تلميذ المفروض بيشبه سيده، وإحنا سيدنا كان مثال في التسامح وطول الأناة.
طول الأناة كمان معناها إننا نسيطر على ردود أفعالنا، ونتعلم أن مش كل مرة حد يزعلنا نرد بكلام جارح أو نفكر في الانتقام بسهولة زي ما العالم بيفكر او بيعمل، لا ده بيكون اختبار لإيماننا وقوة روحنا الجديدة اللي خدناها بعد مجيء المسيح وتعاليمه اللي المفروض غيرت في حياتنا وطريقة تفكيرنا وأسلوبنا.
إزاي نوصل لطول الأناة؟
والنفس علشان توصل لمرحلة طول الأناة فهي زي السيف الحديد اللي محتاج أنه يتسخن ويتطفى عشان يبقى قوي، فمن خلال التجارب اللي بنمر بيها رغم صعوبتها وتقلها أحيانًا، لما بنتحمل وبنصبر، بتشكل فينا وبتعلمنا ازاي يكون عندنا طول أناة، وكل ما نمر بتجربة ونصبر عليها، بنبقى أقوى وبيبقى عندنا القدرة على مواجهة الحياة.
وفي الآخر، طول الأناة دي بتساعدنا نتعامل مع كل حاجة في حياتنا، سواء الكلام السلبي، أو المرض، أو الأصحاب اللي بيستفزونا أحيانًا، وحتى العيلة اللي ممكن تكون مش متفاهمة أو عارفين نتعامل معاهم، كل ده بنقدر نستحمله بفضل طول الأناة وثمر الروح اللي جوانا.
Facebook: @PWOfficial
