صلاة حسب مشيئته
لما بنتكلم عن الصلاة، لازم نفهم إنها مش بس كلام نقوله وخلاص، لكن الصلاة دي حاجة عميقة جوانا، وليها معنى كبير في علاقتنا بربنا وخصوصًا أن ربنا بيسمعنا وحسب مشيئته الصالحة لينا بيستجيب، زي ما الكتاب قال: "وَهذِهِ هِيَ الثِّقَةُ الَّتِي لَنَا عِنْدَهُ: أَنَّهُ إِنْ طَلَبْنَا شَيْئًا حَسَبَ مَشِيئَتِهِ يَسْمَعُ لَنَا" (1يو 5: 14).
حسب مشيئته
بس حاجة مهمة في البداية لازم نفهم أن يعني إيه نصلي حسب مشيئة الله؟، يعني نكون عارفين إن ربنا مشيئته دايمًا بتكون لخيرنا حتى لو مش فاهمين ده ومش مستوعبينه، وبنطلبها وإحنا عارفين إنها للخير حتى لو مش فاهمين.
ولما بنقول نصلي باسم يسوع، ده معناه إننا بنصلي بإيمان حقيقي وبقلب مؤمن مش بمجرد كلام بنقوله وخلاص أن ربنا أكيد هيسمع ويدبر الأمر لو فيه خير لينا، زي ما المسيح نفسه قال: "وَمَهْمَا سَأَلْتُمْ بِاسْمِي فَذلِكَ أَفْعَلُهُ لِيَتَمَجَّدَ الآبُ بِالابْنِ. إِنْ سَأَلْتُمْ شَيْئًا بِاسْمِي فَإِنِّي أَفْعَلُهُ" (يو 14: 13، 14).
فرحنا في مشيئته
وكمان السيد المسيح وضحلنا إن لما نطلب حاجة بإسمه، ده معناه إننا هناخد اللي طلبناه وفرحنا هيكمل لو كان حسب مشيئته لينا ولحياتنا، وده مش بس كلام، ده وعد منه لينا: "اَلْحَقَّ الْحَقَّ أَقُولُ لَكُمْ: إِنَّ كُلَّ مَا طَلَبْتُمْ مِنَ الآبِ بِاسْمِي يُعْطِيكُمْ. إِلَى الآنَ لَمْ تَطْلُبُوا شَيْئًا بِاسْمِي. اُطْلُبُوا تَأْخُذُوا، لِيَكُونَ فَرَحُكُمْ كَامِلًا" (يو 16: 23، 24).
وفي حاجة كمان مهمة، لما بنصلي مع بعض، ربنا بيكون موجود معانا. وده مش مجرد إحساس بنحسسه، ده حقيقة بنعيشها ووعد منه: "إِنِ اتَّفَقَ اثْنَانِ مِنْكُمْ عَلَى الأَرْضِ فِي أَيِّ شَيْءٍ يَطْلُبَانِهِ فَإِنَّهُ يَكُونُ لَهُمَا مِنْ قِبَلِ أَبِي الَّذِي فِي السَّمَاوَاتِ، لأَنَّهُ حَيْثُمَا اجْتَمَعَ اثْنَانِ أَوْ ثَلاَثَةٌ بِاسْمِي فَهُنَاكَ أَكُونُ فِي وَسْطِهِمْ" (مت 18: 19، 20).
الخلاصة
الموضوع مش بس إننا نقول كلام ونخلص ونقول أننا صلينا لا، لازم نفهم إن لما بنصلي بايمان، صلاتنا دي قادرة تصنع مستحيلات وتحقق حاجات أكتر من اللي بنتخيلها أو بنفكر فيها، لأنه بيحبنا وفرحنا مهم عنده، وأن لما نطلب باسمه لازم نفهم أن اسمه ده برج حصين قادر يحمينا من مخاطر كتير وكمان يدينا أفراح أكتر من اللي ممكن نستناها.
ربنا يدينا القلب اللي يصلي بعمق، ويكون مؤمن حقيقي أن الصلاة قادرة تخلق فرق وتغير فعلًا في حاجات كتيرة حواليه، لما يطلب بإيمان من ربنا، ويكون سايب لربنا حياته فعلًا يدبرها بالشكل الصح واللي يليق بولاده.
Facebook: @PWOfficial
