يعطي حكمة.. بابا حنين (13)
في كل مرة تكون محتار، ومش عارف توصل للقرار الصح، تقدر تعمل 3 حاجات مهمين جدًا يخلوك تقدر توصل للقرار الصح، وبسهولة ومن غير أي مشاكل، طبعًا مش هقدر أقولك عليهم أنهم خلطة سحرية، لكن أقدر أقولك أنهم حاجات بننساهم وقت التجارب الصعبة، أو في وقت الحيرة كمان.
أول شيء، صفي ذهنك، ومتقعدش تفكر في المشكلة طول الوقت، وتفضل تضغط على نفسك، لكن حاول أنك تكون هادي لأن ده هيساعدك أكتر، لأن الضغوط الكتيرة أو المشاعر الإيجابية كمان الكتيرة ممكن تخليك تاخد قرارات تندم عليها بعدين، فلازم في البداية إنك تكون هادي.
الحاجة التانية، واللي علشان تعرف تستفيد منها لازم يكون ذهنك صافي فعلًا، هي أنك تسمع لصوت ربنا في قلبك وجواك، أنك تدي فرصة لصوت ربنا يتكلم في قلبك ويرشدك للطريق الصح، زي ما أرشد زمان المجوس لمزود البقر، وزي ما أرشد بطرس والتلاميذ وخلى الشباك مليانة بالسمك، صوته هيرشد قلبك للطريق الصح والمكان الصح، بس المهم أنك تسمع صوته في قلبك، وأنك تدي فرصة لأن صوته يظهر بوضوح في حياتك.
آخر حاجة، رتب قرارك وصدق، رتب قرارك اللي هتمشي عليه في حياتك، وصدق أن ما دمت ماشي ورا صوت الله في قلبك أنك هتوصل لبر الأمان، لأن زي ما الكتاب المقدس كان بيقول: "الرَّبَّ يُعْطِي حِكْمَةً"، وأكيد حكمته لحياتك دايمًا هتكون خير.
Facebook.com/Pwagih
