اصبر للنهاية.. بابا حنين (5)
عزيزي، أحيانًا العمر بيضيع مننا وإحنا غرقانين في التفكير ومحاولة تدبير حياتنا بنفسنا، وبننسى إن فيه إله حنين ورحوم في إيده كل أمور حياتنا، والحقيقة أنا بعذرك أحيانًا وبعذر نفسي لما بنخاف ولما القلق بيتملك قلوبنا، واليأس بيملى روحنا بالخوف من بكرا وأحيانًا كمان من النهارده.
لكن صدقني، في اللحظة اللي هتصدق فيها أن ربنا بيدبر حياتك وبشكل كمان أفضل وأحسن من اللي بتتمناه، هتحس بإيد ربنا في كل حاجة بتشوفها أو بتمر بيها في يومك سواء النهاردة أو بكرا، ولما تفتكر كم المراحم اللي شوفتها منه إمبارح وعلى مدار سنين حياتك، هتصدق أن الله فعلأً صالح ومبيتخلاش عن ولاده.
قبل ما تسيب نفسك لليأس، أو تسيب القلق ياكل الباقي من عمرك، سيب حياتك كلها لربنا، قول له حياتي كلها في إيدك شَكلها أنت كما يحلو في عينيك، وخليك متأكد أنه الفخاري الأعظم اللي يستحيل يخلي تشكيل حياتك غير بالشكل اللي يعلن عن عمله العظيم في حياتك.
جايز بس كل اللي محتاجه في الوقت الحالي أنك تصبر، تصبر وتصدق أن الله صالح وتدبيره عظيم لحياتنا، وأن حتى لو صبرنا طال، فالنتيجة اللي هنشوفها في الآخر تستحق الصبر، وتستحق الإيمان أن الله رؤوف وهيفرحنا في آخر الأمر، وأفتكر دايمًا أن "الَّذِي يَصْبِرُ إِلَى الْمُنْتَهَى فَهذَا يَخْلُصُ"
Facebook: @PWagih
