الحياة مبتتغيرش
لو فضلت مستني من الحياة تتغير من حواليك يبقى مفيش حاجه هتحصل، لآن الحياة عمرها ما هتتغير ولا الظروف هتتغير هي كمان، لكن اللي ممكن يتغير فعلا هو نظرتك إنت ل الحياة وإنك أنت تشوف الحياة بعين تانية وبنظرة ثانية غير اللي إنت متعود عليها.
الحياة طول الوقت هتفضل بتمشي لكن لو إنت فضلت واقف مكانك وبتبص بنفس النظرة المحدودة وبتلعن في الحياة وفي الظروف وفي كل حاجة حواليك هتفضل إنت واقف مكانك. ومش بس كده لا ده كمان هتشوف الحياة والناس وهم بيسبقوك وبيمشوا وبيطلعوا لقدام ويمكن تيجي عليك اللحظة اللي تقول فيها ياريتني، وياريتني هنا هتبقى بتتقال على حاجات كثير، ياريتني كنت ما وقفتش ياريتني كنت أخذت خطوة ياريتني كنت غيرت فكرتي عن الحياة.
الكلام مش فلسفي ولا واخذ بعد عميق، لكن بقول لك حقيقة يمكن تكون من وحي تجربة أو يمكن من خلال تجارب شفتها أو سمعت حتى عنها، لآن هي دي الحياة يا صديقي، يمكن مش طول الوقت تبقى شبه الحياة اللي إحنا راسمينها في خيالنا أو حتى اللي إحنا كنا بنتمنى نعيش فيها، لكن هي دي الواقع اللي إحنا عايشينه والحياة اللي إحنا موجودين فيها.
الحياة اللي لو إنت ما غيرتش رؤيتك لها وعرفت إزاي تستغل كل حاجة فيها هتمشي هي من حواليك وتفضل إنت واقف مكانك بدل ما تشوفها دايما وحشه وتلعن دايما في الظروف حاول إنك تخلع النظارة السوداء من على عينك وتشوفها بشكل ثاني ساعتها يمكن تبقى الحياة حلوة.
