ليس بالمال وحده!
قالت: من كتر ما بشوف إخواتي بيتخانقوا مع أزواجهم على الفلوس علشان مشاغل الحياة ومسئولياتها، ونصايحهم ليا طول الوقت أني لما ارتبط، ارتبط بشخص معاه فلوس وغني، بقيت أول حاجة بشوفها في أي شخص هو معاه كام؟، مع إني مكنتش كده أبدًا في حياتي.
ولكاتبة الرسالة أقول: الحقيقة إن الحياة دلوقتي بسبب أن فيها حاجات كتير، أو بمعنى أدق مفيش حاجة ممكن الواحد يعملها أو ياخدها من غير مقابل مادي، أصبحت الفلوس الهاجس الأول والهم الأول في حياة كل الناس بدون تفرقة، اللي ممكن يفرق هو الفلوس دي هتروح على إيه؟ لكن تفضل الفلوس هي المهمة الأولى والهدف الأول إللي بيسعى له كل الناس.
الحقيقة
لكن الحقيقة أن الفلوس ممكن توجد البيت اللي هيعيش فيه أي اتنين اتجوزوا، لكن الأكيد مش هتوجد الدفء أو الحب اللي يخلي البيت ده متماسك، الفلوس جايز تشتري الأكل حتى لو اختلفت تكلفته أو شكله أو أي حاجة تخصه، لكن أكيد مش هتشتري النفس إللي تخلي الواحد ياكل وهو مبسوط ومرتاح.
البيوت بتتبني على حاجات أكبر من الفلوس، فأحيانًا كتير ممكن تكلمني واحدة متزوجة من رجل أعمال ميسور ماديًا جدًا، لكن تكون بتشتكي من بخله معاها، ويمكن أي حد يسمع كلمة بخل يفتكر أنها بتتكلم على بخل الفلوس، لكن الحقيقة أنها بتتكلم على بخل المشاعر وبخل المحبة، وبخل الإهتمام وبخل الاحتواء.
الأهم
فقبل ما تفكري في شريك حياتك معاه كام، فكري هل أنتي بتحبيه للدرجة اللي تخليكي تكملي معاه طريقه وتمشي معاه رحلة الغنى سوا ولا لأ؟ ومتحكميش بناءً على المستوى اللي ممكن تكون العيلة موفراه ليكي، لأن لو فكرتي، هتلاقي أنهم دفعوا تمن المستوى ده، عمر وصحة وشغل واجتهاد وسعي مستمر علشان يوصلوا لده.
سهلوا الدنيا على نفسكم وعلى الناس اللي شاريينكم، لأن مع الوقت، ممكن الغني ميبقاش غني، وممكن الشخص إللي لسة في بداية طريقه، يبقى ناجح وواصل لحاجة حلوة في حياته، وفي كل الأحوال اللي هيكمل هي المودة والحب، الحب اللي هيحافظ على العلاقة والبيت من أي زلزال ممكن يوقعها.
Twitter: @PaulaWagih
