الرجل ليس خائنا بطبعه.. والزوجة خائنة!
بعيدا عن السياسة ولهيب الأسعار، لفت نظرى مقالة للإعلامية هافيناز فوزى، عن القضية المزمنة، علاقة الرجل والمرأة، والاتهام الدائم للرجل بأن الخيانة في دمه، والخيانة طبيعة في الرجل، كتبت بالعامية تحت عنوان: الرجل مش خاين من نفسه! تقول فيها..
لما نسأل ليه الراجل بيخون؟ يبقى لازم الأول نسأل هو في حاجة إسمها راجل خاين وراجل مش خاين؟ البعض حيرد من السيدات أن الخيانة بتجرى في دمه من أول الزمان.. لا طبعا يا استاذة ياللى بتسألى، عمر الراجل ماكان خاين.. لا إنتى اللى خاينة أيوة وحقولك ليه؟
أولا عمر الراجل ما كان حيتقدم ليكى ده أولا، ولايجيب الشبكة بالشىء الفلانى عشان في النهاية يروح يخون، عمره ما كان حيجيب شقة ويدفع دم قلبه بتجهيزها بشىء وشويات، ولا كان حيسمع كلامك لما قلتى عايزة زى بنت خالتى ولا صاحبتى، وهو الغلبان بيجيب عشان ميزعلكيش..
ولا كان عمره في حياته ما حيمضى على قايمة المكتوب فيها حجات مستهلكة في البيت، يعنى ممكن ينخرب بيته! لا يا قلبى الراجل عمل ده كله عشان بيحبك وكان ناوى يسعدك.. لكن إنتى بغبائك اللى غيرتى المسار! حقولك إزاى..
أول هام لما بقيت كل حاجة بتحصل تحكى لصحباتك الحلوين زيك ويشوروا عليكى ويقترحوا! ثانيا، لما بقيتى متعرفيش تتكلمى معاه غير عايزة أتفسح عايزة أخرج عايزة أصيف الجو حر. عايزة أشترى حاجات جديدة، الولاد عايزين المصروف يزيد..
عايزين حاجات للتلاجة فاضية، وهى أساسا ممكن تتصرف، لا الهانم عايزة تملأ الثلاجة زى ما بتظهر في التليفزيون، وعايزة حاجات يادوب تطلع من التلاجة تبق جاهزة للأكل، من الأخر مش عايزة تتعبى وتعملى حاجة بفن وحب لبيتك..
ثالثا ورابعا وخامسا بقيتى ماتعرفيش جوزك عايز هو إيه، ولا محتاج إيه، كل اللى تعرفيه عنه الفيزا فيها كام، واللى فى جيبك إيه، وموعد صرف المرتب، ولو ربنا مديلوه يبقى الفيزا والرصيد الحلو لازم أول باول تعرفيه، لكن المسكين اللى اتجوز عشان يتهنى ويرتاح ويلتقى حبيبته اللى كانت عاملة البحر طحينة معاه إختفت..
آخر مرة قعدتى مع جوزك إمتى؟ وقولتى كلمة حلوة بحب، آخر مرة حسستيه أن اللى في البيت معاه ست ومحتجاه هو مش الفيزا، آخر مرة عملتيله عشا وحسستيه بالجو الرومانسى اللى وعدتيه بيه قبل الجواز، طبعا كل ده اختفى.
يبقى انتى ياقلبى اللى خونتى نفسك مش هو، إنتى اللى قولتيله يالا يا حبيبى إهرب منى وروح لأول ست تقولك وتعملك اللى أنا طلعت خايبة فيه، إنتى اللى ضيعتى جوزك منك ياقطة مش هو اللى خاين، لان الراجل عمر ماحيلاقى الحب فى بيته ويدور عليه مع حد تانى!
تحبى نقول تانى أكتر ولا كفياكى خيبة وتحاول ترجعى جوزك لحضنك وبيتك.. كد طلع الراجل مظلوم.. لكن نرجع نقول فى طبعا رجالة عينها زايغة بس دول مرضى حقيقي ربنا يكون في عونهم، أتمنى اكون رديت على رسالة الستات اللى ديما بيسألوا جوزى خاين أعمل إيه ؟ أقومه إزاى؟ والحل إيه؟ وآخر خيانته ليها إيه؟
انتهت كلمات الصديقة هافيناز فوزى، وهى شهادة من إعلامية تعمل في العمل الصحفى سنوات طويلة، ستغضب النساء، والمهم أن ما قيل جدير بالحوار.
