غراب البين يكتب: سنظل أوفياء وصلاح فى الزمالك
![غراب البين، فيتو](images/no.jpg)
بعد يوم طويل من اللف والدوران والمرازية فى خلق الله.. قررت إنى أريح جتتى ساعتين.. وقفت على فرع الشجرة وانكمشت بين جناحى وقبل أن أغمض عيني سمعت هرجا ومرجا يأتى من المقهى أسفل الشجرة..
بنظرة إلى أسفل أدركت أن محمد صلاح أحرز هدفه الأول فى الموسم الجديد من الدورى الإنجليزى وقبل أن أعود لوضعى سمعت شابا يقول: أنت كدا هتخلينى أكرهك يا أبو مكة.. فيرد عليه آخر قائلا: أنا قلتلك من زمان إن محمد صلاح زملكاوى وأنت مش عايز تصدق أما ثالثهم فقال: هو لو مش زملكاوى مكانش شاور بالسهم بتاع الزمالك بعد إحراز الهدف، أما رابعهم فقال بكل هدوء: كدا يبقى صلاح بيداعب الزمالك علشان عايز يرجع يلعب فى مصر..
وهنا أدركت إن الليلة دى مفيهاش نوم.. فوقفت على قدمى ونفشت ريشى وأخذت أنعق بأعلى صوتى “قاق قاق”.. فراح زبائن المقهى الزمالكاوية يهشوننى ويقولون لى: غور من هنا يا غراب البين جبتلنا النكد والفقر..
فهربت مسرعا ولسان حالى يقول: بقا أنا اللى جبتلكم النكد والفقر أم أنكم من تنكدون على أنفسكم وتقضون نصف أعماركم تنتظرون دورى أو كأس طب تقدروا تقولولى بأى أمارة عايزين صلاح ممكن يفكر مجرد تفكير إنه يلعب للزمالك؟!
جاتها ستين ألف نيلة اللى عايزة تخلف بنى آدمين زيكم شعارهم فى الحياة “سنظل أوفياء” ثم يريدون صلاح فى الزمالك!