ساخرون، غراب البين يكتب: البني آدمين فى مصر مالهُمش كتالوج
![غراب البين، فيتو](images/no.jpg)
بعد يوم طويل من اللف والدوران والمرازية فى خلق الله.. قررت أريح جتتى ساعتين.. جلست فوق فرع الشجرة وانكمشت بين جناحىَّ وقبل أن أغمض عينى سمعت صوتا يأتى من المقهى أسفل الشجرة لشاب يقول: أقطع دراعى لو ماكانتش دى مسرحية عاملها ترامب علشان يكسب تعاطف الشعب الأمريكى..
شاب آخر رد عليه قائلا: فعلا عندك حق الناس كلها عالفيس بتقول إنها تمثيلية والدم اللى على وجه ترامب دا عبارة عن حبر أحمر كان موجود تحت الكاب بتاع ترامب، ولما نزل تحت الترابيزة قام بدهن أذنه وجزء من خده.. أما ثالثهم فقال مستنكرا: طب إزاى كل دا يحصل قدام الكاميرات والجماهير اللى موجودة؟!
وهنا أدركت أن الليلة دى مفيهاش نوم فوقفت على قدمى ونفشت ريشى وأخذت أنعق بأعلى صوتى “قاق قاق” فراح زبائن المقهى يهشوننى ويقولون لى غور من هنا يا غراب البين جبتلنا النكد والفقر..
فهربت مسرعا ولسان حالى يقول: بقا أنا اللى جبتلكم النكد والفقر أم أنكم من تنكدون على أنفسكم وعلى العالم بحاله؟!
يعنى العالم كله بيدين ويشجب محاولة اغتيال ترامب وأنتم الوحيدون اللى شايفين أنها تمثيلية؟! يعنى السوشيال ميديا فى كل بلاد العالم منتظرة نتيجة التحقيقات لمعرفة الجانى.. والسوشيال ميديا في مصر هى الوحيدة اللى كشفت اللغز قبل مرور ربع ساعة على الواقعة؟! أما صحيح شوية بنى آدمين غاويين هبد وهرى.. فعلا شعب مالوش كتالوج!