غراب البين يكتب: الرقص مقابل شهادة التخرج
بعد يوم طويل من اللف والدوران والمرازية فى خلق الله.. قررت أريح جتتى ساعتين.. وقفت على سور بلكونة الست نبوية وأخذت نفسا عميقا، ثم جلست وانكمشت بين جناحىَّ.. وقبل أن أغمض عينى سمعت صوتا لشاب يأتى من المقهى أسفل البلكونة حيث يقول: أنا شايف إن البنت إيمان لو رقصت فى الحفلة ممكن تعمل ترند..
زميله يرد باندهاش: يا ابن اللذينة جبتها إزاى دى! ثوانى هكلمها وأحاول أقنعها. ثالثهم رد قائلا: بس خليها تتكلم مع أمها وتقنعها إنها هترقص فى حفلة التخرج علشان لما تبقى ترند أمها تطلع تقول بنتى هبلة وعبيطة وطيبة ومكانتش تقصد الإثارة وكل الحكاية إنها عبرت عن فرحتها مع زملائها.. وخليها تقول كمان إنها اتفاجأت بالفيديو منتشر وبتعليقات الناس على السوشيال ميديا..
وهنا لم أستطع إكمال باقى الحوار فوقفت على قدمى ونفشت ريشى وأخذت أنعق بأعلى صوتى “قاق قاق” فراح الشباب يهشوننى ويقولون لى: غور من هنا يا غراب البين جبتلنا النكد والفقر.. فهربت مسرعا ولسان حالى يقول: بقا أنا اللى جبتلكم النكد والفقر أم أنكم من تنكدون على أمة لا إله إلا الله بأفعالكم الغريبة؟!
يعنى إيه يبقى فيه بنى آدمين متخصصين فى ترندات حفلات التخرج؟! ويعنى إيه البنات تقبل بالنوعية دى من الترندات؟! دا موضوع رقص البنات فى حفلات التخرج أصبح أمرا واقعا وكأن البنت اللى مش هترقص هيحرموها من استلام الشهادة.. أما صحيح شوية بنى آدمين ناقصين عقل وتعليم!
