ساخرون، غراب البين يكتب: الغش أسلوب حياة البنى آدمين؟!
بعد وقت طويل من اللف والدوران والمرازية فى خلق الله.. قررت أريح جتتى ساعتين.. وقفت على سور إحدى مدارس الثانوية العامة وكان الجو هادئا، حيث جميع الطلاب موجودون داخل لجان الامتحانات جلست وانكمشت بين جناحىَّ وقبل أن أغمض عينى سمعت صوتا لشاب يقول لزميله أنا معاى الأسئلة اللى اتسربت وكمان معاى الإجابات..
عايزين نغشش الأولاد بس مش عايزين حد يحس بينا.. وكفاية الست اللى كانت بتغشش في الدقهلية وتم تصويرها فيديو وبقت ترند وفضيحتها بقت بجلاجل وكمان الداخلية قبضت عليها وحولتها للنيابة..
وهنا أدركت أن المكان ده مش هينفع أريح فيه جتتى، فوقفت على قدمى ونفشت ريشى وأخذت أنعق بأعلى صوتى “قاق قاق” فراح الشابان يهشوننى ويقولون لى: غور من هنا يا غراب البين جبتلنا النكد والفقر..
فهربت مسرعا ولسان حالى يقول: بقا أنا اللى جبتلكم النكد والفقر أم أنكم من تنكدون على أنفسكم وعلى أبنائكم وعلى جيل بأكمله تريدونه أن ينجح بالغش ثم تنتظرون منهم مستقبلا مشرقا..وتحلمون بأجيال تطبق العدل وتخلص لوطنها وأهلها بينما أنتم تصرون على أن تمنحوهم النجاح بالغش والتدليس..
ياخى جاتها ستين ألف نيلة اللى عايزة تخلف بنى آدمين زيكم مش عارفين هما عايزين إيه ولا بيفكروا إزاى، وأصبح الغش بالنسبة لهم هو أسلوب حياتهم ويورثونه لأبنائهم باعتباره فهلوة وشطارة!
