بكل القلب
بيقولوا إن لما تعمل حاجة بكل قلبك، ده بيكون السر في النجاح، والحقيقة إن القاعدة دي مش جديدة علينا، اللي بيحبوا شغلهم وبيبذلوا فيه مجهود دول اللي بيوصلوا للقمة.. أما اللي قلوبهم مش معاهم، يعني مش مركزين، فأكيد هيكونوا أول الناس معرضين للفشل أو أنهم ميوصلوش للي هما عايزينه أو بيتمنوه زي التانيين، وده مش ظلم مثلًا أو قلة عدل.
لكن لأن ربنا مابيديش ثمر للكسلانين، ومستحيل يملأ خزاين اللي بيقعدوا مكتوفين الإيدين، اللي مابيدوروش على الكنوز، وده شوفناه في مثل الوزنات وأن اللي تاجر وربح استاهل يفوز واللي راح دفنها ومشتغلش مأخدش غير جزاء اللي يستاهله.
واللي بيشتغل بجد وبيحاول طول الوقت في شغله، دايمًا بتتفتحله فرص جديدة، وده مش بس في الحياة العادية، ده كمان في الحياة الروحية مع ربنا يعني لو عايز تنجح في خدمتك لربنا أو في حياتك معاه، لازم تكون مخلص في خدمتك وحياتك معاه.
وافتكر أن الحياة أو المحاولة الصادقة اللي بتكون بكل القلب يعني تستمر وتداوم من غير ما تزهق أو تمل في نص الطريق وأنت فيه لكن تكون بتحاول طول الوقت أنك تفضل محافظ على نشاطك ومحاولاتك.
وممكن الواحد اللي بيحاول بأمانة يتعب ساعات في الأول أو يقع، لكن في الآخر أكيد بيقوم وبيكمل لأن ربنا بيكمل وبيسنده لأنه شايف أمانته، لكن يفضل السؤال الأهم، هل بتحاول فعلًا من قلبك ولا لا؟.
