شوف نفسك بعيون الله.. بابا حنين (6)
ميغركش كلمات الناس الحلوة في حقك، ومتزعلش على وصفهم ساعات ليك باللي مش فيك، لكن عيش دايمًا وأنت رافع قلبك لربنا، وأطلب منه طول الوقت أن يكون قلبك كل أعماله مُرضية قدامه، لأن ربنا بس هو اللي عارف حقيقة القلب.
الناس أحيانًا ممكن تمدحنا بزيادة، فاكرة أن المدح هيفيدنا وممكن يخلينا نكون أحسن، لكن مع الوقت بيكون سببا أن القلب ينسى الحقيقة وينسى أنه لازم يجاهد ويحاول في الحياة دايمًا علشان يوصل للصورة الحلوة اللي بيتمناها فتكون النهاية سيئة وغير اللي بنتمناها أو حتى ربنا كاتبها لحياتنا.
وأحيانًا الناس علشان غلطة، تنسى محبة عمر كامل وتوصفك بأوصاف مش فيك، وتكون بسبب كلامهم صورة عمرها ما كانت أنت، ولكن مع الوقت جايز تكونها أنت فعلًا علشان سمعت وسلمت ودنك فقلبك صدق وللأسف بقى زي ما الناس كانت بتقول عليه، فتبقى النتيجة أنك تتغير وتتحول والبياض اللي جوة روحك يتحول لسواد الفحم، مش بس في لونه لكن كمان في آثره اللي بيتساب في إيد كل واحد بيلمسه أو بيقرب منه.
لكن لما ترمي كلام الناس ورا ضهرك وتعمل زي نصيحة أبو مقار القديس لتلميذه لما قاله أمدح الموتى مرة وذمهم مرة وقول لي عملوا ايه؟، رجع قال له محدش رد عليه، وساعتها كانت نصيحته أنه يعيش زي الموتى دول، ميهموش كلام الناس، لكن يعيش بس بصورته هو عن نفسه، وصورته عند ربنا عاملة إزاي، لأن عين ربنا بتستر عيوبنا عكس عيون الناس، وأيد ربنا بتجملنا، عكس أيد الناس اللي بتشوهنا، عيش بس حسب إرادة الله لحياتك وشوف نفسك دايمًا بعيونه ومحبته الكبيرة ليك.
Facebook: @Pwagih
