الإناء المختار
أوقات كتير بسمع ناس بتقول هو الأباء الكهنة بيعملوا إيه يعني! وبينسوا حاجة مهمة وهي أن ربنا مبيختارش أي حد والسلام.. ربنا لما بيختار حد يرعى شعب أو يكون خادم.. اتأكد أنه بيكون اختاره وميزه بحاجات كتير.. ميزة بأنه يكون زي يوسف يعرف يسامح غيره لو أذوه أو ضايقوه في خدمته.. أنه يكون له طاقة صبر زي أيوب وقت التجارب الصعبة والمؤلمة.
أنه يكون قوي زي أبونا إبراهيم ويختار ربنا على حساب بيته أو أسرته أو ولاده. أنه يكون زي بولس الرسول يشهد لربنا وعن ربنا قدام الكل من غير ما يخاف أو يقلق من حد. يكون زي بطرس الرسول صخرة وإيمانه ثابت تقوم عليها خدمة ربنا وكنيسته. يكون في الأول وفي الأخر زي سيده المسيح، بيبذل نفسه عن خرافه وبيغسل رجلين تلاميذه.
أوقات ممكن تحس أن حد من الآباء قصر في حقك، لكن لما تحط نفسك مكانه هتعذره، لما تشوف كم اللي بيتعرض له في يومه وخدمته مش هتلومه، وقبل ما هتفكر تزعل منه، هتلاقي نفسك بترفع ايدك وبتصلي لربنا أنه يقويه ويعينه وأنه حتى لو قصر فهو في الآخر إنسان وزي ما بيعمل حاجات كتير ممكن يقصر وربنا يكمل، وفي النهاية بيصلي للكل على المذبح سواء اللي طلبوا سواء لنفسهم أو لغيرهم أو حتى اللي مفيش حد يذكرهم.
وقبل ما تدين أفتكر أن لما تركز في الصورة وتشوف كم التفاصيل اللي بيعشوها من يوم سيامتهم، هتعرف أن الكاهن زي السيد المسيح، بيتصلب علشان شعبه كل يوم، وزي ما السيد المسيح اتصلب علشان يصلح الأرضيين مع السمائيين والخطية الأولى، فالكاهن بيشيل صليبه علشان يوصلنا للمسيح في الآخر.
Instagram: @PaulaWagih
