صلاتنا للعام الجديد
يارب كلها ساعات ونبدأ سنة جديدة معاك، سنة عدت بكل حاجة صعبة ومؤلمة أو حتى حلوة،
ومش هيفضل منها غير عينك اللي بتكون علينا من أول السنة ولحد آخرها، بشكرك على كل حاجة حلوة شوفتها فيها كانت منك..
بشكرك على كل ضيقة شوفتها فيها وكنت معايا، بطلب منك إن السنة الجديدة تكون معايا فيها وتحفظني، وأحس بأيدك في كل لحظة فيها وهي بتسندني وتقويني، أنا عارف يارب أن يمكن قلبي ميكونش صالحا ولا يستحق، بس لأنك صالح وعطوف وصانع الخير مش هتتخلى عنى، مش هتتخلى عن قلب متعلق بيك ومشتاق يشوف الفرح من ايدك.
القلوب الحزينة يارب عزيها.. وألمسها بحبك ونعمتك، القلوب الزعلانة من غياب شخص سواء بموت أو فراق قويها وإشفي آلامها واديها السلام، المحتاجين للشفاء يارب قويهم وأشفيهم.. المحتاجين سد يا رب احتياجهم لأنك أنت اللي بتبعت القوت حتى لصغار الغربان..
الطلبة يا رب اديهم أنت النجاح من عندك، كل المحتاجين لفرص عمل اديهم فرص واديهم نجاح كل المحتارين والتايهين في طرق الحياة، أرشدهم للطريق الصحيح وعرفهم طريقهم في الحياة، إعطي الفرحة كل النفوس المشتاقة لأي فرحة..
كل اللي مروا بنهايات مؤلمة.. اديهم يا رب بدايات جديدة تنسيهم آلم النهايات الصعبة، كل المشتاقين للمسة طبطبة وشعور بالحب والقبول.. اغمرهم أنت بحبك اللي مفيش حب يقدر يعوضه أو يكون بديل له..
أحفظ بيوت شعبك واملاها بالسلام والأمان.. أملى مخازنهم بالخير والنعم وفيض بخيرك عليهم، أحفظ كنايسنا ورعاتنا وكل الخدام اللي بيرعوا شعبك، بارك في الزروع والخضرة وأحفظ مياه النيل، فرق كل أعداء شعبك وإبطل مشورتهم زي ما أبطلت مشورة أخيتوفل.
كل اللي فارقونا بالموت اديهم النياحة واديهم الراحة في أحضان قديسيك وإبعت لكل حبايبهم السلام والتعزية والصبر على الفراق، إحفظ كل بني البشر وقربهم منك بايدك ومحبتك ونعمتك اللي مفيش زيها.
أحفظ سلام العالم وامنع منه محاربات إبليس ومحاولاته في تفريق البشر وزرع الشر ونزع الخير وزلزلة السلام.. خلي سلامك يسود في القلوب ويسود ع العالم وفي كل مكان. إبعد عنا حروب عدو الخير وإن كان فيه أي خطية بتتملكنا إكسر حبها في قلوبنا وخلي محبتك أنت اللي تتملك فيه.
وإن كان فيه روح شريرة متسلطة على نفوسنا إكسرها زي ما كسرت شوكة الموت بصليبك وبدمك الطاهر، ادينا نتمتع بملكوتك وأن عينك تكون عليه دايمًا وميشغلش قلبنا غيره وإحنا على الأرض،
احفظنا في أيام غربتنا وعولنا إحنا الغرباء، ادينا نتحد بيك في وليمتك السمائية وإحنا لسه على الأرض.
ادينا نحس بغيرنا ونحس بألم غيرنا ومنكونش قضاة على بعض أو ندين بعض، ادينا نحب زي ما بتحبنا، حب غير مشروط ومش مستني مقابل من حد، حب خالي من الشروط أو الإدانة أو حتى انتظار المقابل، ادينا القلب اللي يكون بيسند غيره وقت الضيقة ووقت الحزن، مش اللسان اللي بيوعظ وبيتكلم أكتر ما يحس أو يسمع..
ابعد عنا الموت والغلاء والوباء وسيف الأعداء، ادينا السلام يا ملك السلام. لأن كل شيء منحة منك يا رب فخلينا نحس بالسلام في كل لحظة في يومنا، وفي كل يوم في السنة الجديدة بنبدأها معاك. لأن ليك ويليق بيك أنت بس المجد الدائم والسجود والقوة إلى الأبد. آمين.
