حسام حبيب: بكيت لما شيرين حلقت شعرها ولما اتصالحنا عشنا مع بعض من غير ورق
قال المطرب حسام حبيب: "اللي وصلني لقرار طلاق شيرين عبد الوهاب إني ما كنتش راضي عن أسلوب حياتها وعيشتها، ولقطة حلق شعرها كانت بتحاول تجبر نفسها وتجبرني إني أطلقها رغم حبها الشديد ليَّ ولكن بفعل ضغوط أهلها".
بكاء حسام حبيب
وتابع خلال مداخلة هاتفية ببرنامج “الحكاية” الذي يقدمه الإعلامي عمرو أديب بقناة “إم بي سي مصر”: "لما شوفت شيرين عبد الوهاب وهي حالقة شعرها انهرت من العياط واغمى عليَّ وقلت لها ليه عملتِ ليه، وفي نفس اليوم اتخانقنا واتطلقنا، لأني كنت شايف أن الموضوع واصل لحتة إني ما ينفعش أكمل معاها، وأنا لو بفكر في الفلوس كنت عملت لي أغنية كل شهر وبقيت أشهر من شيرين ولكن أنا من يوم ما اتجوزتها معملتش أغنية واحدة".
موقف حسام حبيب من إدمان شيرين للمخدرات
وتساءل: "هل يعقل إن شيرين عبد الوهاب من يوم بيان الصلح لحد لما حصلت أزمتها الأخيرة إني وصلتها لمرحلة الإدمان للدرجة الثالثة مثلما صرح شقيقها؟ ده احنا مكناش بنكلم بعض من وقت طلاقنا".
زواج غير رسمي
وأشار: "لما اتصالحنا رجعنا كأزواج بس محدش كان عارف غير أهلها وأهلي، والطلاق حصل بورق والزواج ما كانش على الورق".
حقيقة تنمر حسام حبيب على شيرين
ولفت: "مفيش ولا مرة قلت لشيرين أنتِ تخينة ولكن كنت اتكلمت مع واحدة صاحبتها إني بوظت شيرين علشان كان المفترض كنت قلت لها خلي بالك أنتِ بتتخني ولكن سكوتي ضرها، وكان مهم إني أقولها لازم تاخد بالها من جسمها وما يزيدش وزنها، وتخس وتاخد بالها من صحتها ونفسها، ولكن أسلوب حياتها كان كله غلط ودا اللي كان بيضايقني".
