تعرف فلان؟
كام مرة سمعت أن فلان ده مغرور أو متكبر؟، ولما قربت منه لقيته عكس ما الناس دايمًا بتقول عليه، كام مرة سمعت كلام اتنقل من خلال شخص على لسان شخص مقرب منك أنه غلط فيك وبالمواجهة طلع إن الشخص اللي نقل الكلام هو اللي قاله مش الشخص اللي اتقال إن الكلام ده على لسانه؟
في حياتنا دلوقتي، بقينا بنشوف الناس بالودان أكتر من لما بنشوفهم بعينا، بقينا بنكون أحكام عنهم بناءً على كلام اتقال، مش على عشرة أو مواقف جمعتنا بيهم، وكأن الحياة كلها مبنية على رأي الآخرين، مش على رأينا إحنا الشخصي، أو رؤيتنا إحنا وتحليلنا للأمور.
ربنا في تكوينه لرأس الإنسان، خلق المخ في الجمجمة ومن الخارج خلق الودان، علشان الكلام لما يدخل من واحدة، قبل ما يخرج من التانية يعدي على المخ في النص علشان يبدأ يحلله ويبدأ يفكر فيه ويكون عليه وجهة النظر الشخصية والرأي الشخصي له بخصوص الكلام اللي بيتقال واللي بيسمعه من الناس حواليه.
اتعلم في حكمك على الأشياء قبل الأشخاص أنك تقرب من الحاجة علشان تعرفها فعلًا، علشان تعرف هي إيه أو إيه هي مكوناتها أو التفاعل ما بينها وبينك هيبقى عامل إزاي، زي أبسط حاجة، كلنا معرفناش أن الكهرباء غلط القرب منها غير لما اتكهربنا لما قربنا صوابعنا منها وإحنا صغيرين.
نفس النظام، أحيانًا تسمع حد يقول فلان ده متكبر أو مغرور، لكن حقيقة الأمر إن الشخص ممكن ميكونش متقبل الشخص اللي قال عليه كدا في حياته، فالشخص فهم الرفض ده كنوع من التكبر أو الغرور، أو يمكن لأن الشخص اللي اتقال عليه كده بيخاف من الناس فبيفضل الوحدة، فزي ما أنت تحب ميتحكمش عليك من الناس، متحكمش على حد غير لما تقرب انت منه.
Twitter: @PaulaWagih
