يا وزير ماليتنا لحد امتى حنفضل في غلاء ساكتين.. خايفين تضيع البلد في كافة الميادين| ساخرون

أبين زين

أبين زين.. وأقول على المستخبي واللي مش معروف.. واضرب في ودعي وتمللي بادعي.. والمستخبي باقوله ع المكشوف



يا وزير ماليتنا قول لي الفين ؟.. ولحد إمتي حنفضل في غلاء ساكتين..

وكل يوم فيه مطالب كلنا عايزين.. والدولة حتجيب منين والناس صفوف واقفين..

يطالبوا عايزين حقوقهم من سنين وسنين.. والمسئولين يوعدوهم بس مش قادرين..

يبقي لا بد التفاهم تعرفه الملايين.. خايفين تضيع البلد في كافة الميادين..

ونضيع كمان كلنا الشعب والحاكمين.. وودعي بيقول حاجات تحير العاقلين..

بيقول لنا مصر مقصودة من الحاقدين.. ونفسهم تبقي تابعة وناسها مش قادرين..

وأنا بقول للجميع ما تقعدوش ساكتين.. تتظاهروا بس بكلام وتفضلوا نايمين..

الثورة محتاجة خطة واضحة للملايين.. ومش وعود بس تنزل تسعد المساكين..

وسط القري والنجوع ويرجعوا ضايعين..علشان كده نفسي أقول بلاش بقي تسكين..

وصارح الناس وقول إيه خطتك يا رزين.. الاقتصاد يبقي روحنا وللغلابة مُعين..

وأنا في انتظار القرار والخطا والقوانين.. ولو اقتصادنا فضل واقف وكفه ضنين..

كل آمالنا تضيع والناس تعيش ضايعين.