"لبنان عم يبكي الدفا" قصيدة لـ"محمد الرمحي"
شكا الشاعر اللبناني محمد الرمحي، حال لبنان وما وصلت إليه، في قصيدته قائلا:
عِطري أنا عم يرعى بكرومِ الوَرِدْ..
تعمشق بـ فيات الهوى.. وخبى الندى
قَولِك على جسر القمر لسا بَعِد..
في ناس عم تكتب شِعِر.. عِطرو صدى
بعيونِك الـ خبيتا من وِج البَرِد..
لبنان عم يبكي الدفا.. بهاك المدى
أنتي وأنا صِرنا على مفرق وَعِد..
كِل ما التقينا ضاع منا.. كم حدا
في كمشِة عصافير عم تبكي البَلَد
محبوسِة بالـ غيمِة.. بأمطار النِدا
عتّقَت بعيونِك أنا دموعي قَصِد
حتى الجُرُح يسكَر معي.. ما يضيع سُدى
بيت الشِعر بيتي ولساتو عَقِد
وحدي أنا بـِ شُرفتو.. ومالي حدا
قَولِك إزا شي يوم زرعتِك بالجَسَد
بيطلَع من كبوشِك وَلَد.. يمحي الردى!
