ساخرون، غراب البين يكتب: زمن الوظيفة الميرى خلاص انتهى
بعد يوم طويل من اللف والدوران والمرازية في خلق الله.. قررت أريح جتتى ساعتين.. فوقفت على فرع شجرة وانكمشت بين أجنحتي.. وقبل أن أغمض عينى سمعت صوتا يأتى من المقهى أسفل الشجرة لشاب يقول: هو إحنا هنفضل كل يوم كده نسهر للفجرعلى القهاوى بدون شغل ولا مشغلة؟! ده أنا خلصت الكلية وأديت الخدمة العسكرية وقاعد فاضى بقالى سنة ومافيش وظيفة مناسبة ممكن اشتغل فيها!
فرد عليه زميله قائلا: يا سيدى أدينا كلنا منتظرين الوظيفة المناسبة زيك تمام.. هنعمل إيه يعنى.. أنا مش عارف عملوا التخصصات بتاعتنا فى الجامعات ليه طالما مفيش لها شغل بعد التخرج!
وهنا أدركت إن الليلة دى مفيهاش نوم.. فوقفت على قدمى ونفشت ريشى وأخذت أنعق بأعلى صوتى قاق قاق، فراح الشابان ومعهم باقى زبائن المقهى يهشوننى ويقولون لى: غور من هنا يا غراب البين جبتلنا النكد والفقر..
فهربت مسرعا ولسان حالى يقول: بقى أنا اللى جبتلكم النكد والفقر يا شوية بنى آدمين أم أنكم من تنكدون على أنفسكم وعلى البلد كلها؟! يعنى إيه شباب زى الورد يسهر على المقهى يوميا حتى الصباح بحجة إن البلد مافيهاش وظائف حكومية؟!
يعنى إيه تفضل عاطل وعاله على والديك لمجرد إنك مستنى الوظيفة الميرى ومنتظر كمان يشغلوك فى تخصصك اللى عفا عليه الزمن؟! ومحسسنى إنك تخصص برمجة؟!
ياخى جاتها ستين ألف نيلة اللى عايزة تخلف بنى آدمين زيكم مافيش عندهم دم ولا إحساس بالمسئولية اللى شايلها والد كل منهم وسط هذا الغلاء الذى يعانى منه الجميع.. يا بنى آدم قوم اشتغل أى شغلانة وبعدين ابقى دور على تخصصك.. زمن الوظيفة الميرى ده خلاص انتهى.. قال مستنى وظيفة حكومية قال!
