صلاة لـ 2024.. بابا حنين (20)
إلهي الحنون أبويا السماوي بشكرك على 365 يوم مروا بنعمتك وسندتك ومحبتك ليا.. بشكرك على كل حلو شوفته فيها، وبشكرك على كل مر مريت فيه لكن مكنتش لوحدي كانت نعمتك سانداني ومحافظة عليا زي ما حفظت الفتية وسط الاتون وسندت دانيال في جب الأسود.
بشكرك على كل نهاية حطيتها إيدك لمواضيع يمكن مكنتش أتمنى إنها تخلص لكن لأنك بتدبر حياتي كما يليق وللخير نهيتها علشان تحميني وتفتح لي طرق جديد ممهدة، وأبواب مكنتش أتصور إنها تتفتح قدامي.
اديني في بداية السنة الجديدة بداية جديدة ليا معاك، بداية أني أدخل معاك للعمق زي ما التلاميذ دخلوا معاك للعمق ولقوا الخير، لأنك يا ابويا محدش دخل معاك للعمق غير لما وصل للخير والفرح اللي بيدور عليه.
اديني نورك يشرق فيا وينور قلبي المطفي بالحزن والضيقات، ويكون كلامك هو السراج والنور لحياتي واللي بيشرق قدامي زي ما النجم أشرق للمجوس وأرشدهم ليك ولمذودك.
اديني بدايات جديدة تعوضني عن كل نهاية وجعت قلبي وجرحته، وتكون بداية جديدة لافراح من ايدك متنتهيش، تكون أفراح زي فرحة ايوب بتعويضه وفرحة ابونا ابراهيم أن اسحق فضل وتكون زي فرحة يعقوب قديسك لما رجع وشاف يوسف، لأني عارف أن مفيش حاجة تستحيل عليك.
جاي وسايب عليك حمولي في السنة الجديدة وأنا عارف إنك اللي هتريحني لأنك اللي وعدت ومادام وعدت فأنت صادق في وعودك وفي كلامك ليا.
جاي وبطلب منك تدي السلام للعالم وتحفظه وتنهي الحروب والضيقات والالام والأوبئة، تعبنا وبنصرخ تنجينا وتدينا السلام يا ملك السلام، تدينا السلام اللي متهزهوش أحداث ولا تجارب قاسية، سلام حقيقي زي اللي اديته لتلاميذك القديسين وأنك تحفظ ولادك في كل مكان وفي كل حتة في العالم، محتاجين لايدك تفرحنا وتكون السنة الجديدة تعويض عن كل السنين اللي أكلها الجراد يا ابويا الحنين وملكنا السمائي المعزي.
Instagram: @PWagiih
