حلم وزيرة الثقافة !

حركة نشاط مفاجئة وغير عادية بلغت حد الارتباك بمكتب سكرتارية الدكتورة نيفين الكيلاني وزيرة الثقافة.. المطلوب وفق تعليماتها: الاتصال فورًا ومن تحت الأرض بالمطربة مي فاروق! أخيرا وجدوها.. لا يوجد رقم منزل.. إنما الهاتف المحمول فقط: آلو.. الأستاذة مي لو سمحت؟ متحدث: قلنا مليون مرة ده مش رقمها.. يا جماعة رقمها أتغير من زمان!

حالا سنجده في المركز الإعلامي ل دار الأوبرا.. مؤكد الرقم الجديد هناك: آلو.. يا أستاذة أزي حضرتك ؟ هنا مكتب الوزيرة.. الدكتورة نيفين الكيلاني..لحظة واحدة معالي الوزيرة هتكلمك.. بعد إجراءات تحويل المكالمة: مع سيادتك الأستاذة مي يا فندم !

في اليوم التالي

الوزيرة: معلش يا مي.. كان لازم نتقابل أفضل.. مكالمة إمبارح كانت بعد اليوم ما خلص.. والموضوع مكانش هينفع في التليفون..
مي: تحت أمر حضرتك طبعا..

الوزيرة: أقولك.. عجبتني أوي منك أغنية رق الحبيب ومن غير ميوزيك كمان.. طبعا سمعتك قبل كده كتير بتغني لأم كلثوم.. لكن رق الحبيب صعبة أوي.. لكنك ثقة وكبرياء كده.. وأيه حاجة تفرح.. كمان الجمهور أنسجم جدا وأنتي هيمنتي عليه.. عارفة سحرتي الناس.. أنتي طبعا عارفة أني درست باليه وكمان نقد فني.. لكن أشتغلت 11 سنة منسق الموسيقى بالصندوق!

مي: صندوق التنمية الثقافية؟!
الوزيرة: برافو عليكي.. أيوة.. ولي مقالات عن الموسيقي والأوبرا والمسرح الأستعراضي.. ده كمان أشرفت علي رسالة ماجستير عنه.. عن المسرح الاستعراضي يعني.. من فترة كدة في 2009.. قريبتكم يعني.. شوفي..مش عايزة أطول عليكي.. أداءك أدهشني الحقيقة.. وعلشان كدة فكرت أننا نعمل ليالي أم كلثوم.. بس مش هنا في الأوبرا.. ولا في القاهرة كلها..

إحنا نلف محافظات مصر.. تعالي يا مي ننضف أذان الناس.. ونخليهم يسقفوا لأم كلثوم وفنها من تاني.. عندنا مواهب كتير.. مش بس أمال ماهر وريهام عبد الحكيم..لا.. مروة وريم.. أقصد مروة ناجي وريم كمال عندنا غادة رجب.. العفريتة بنت عفاف راضي القمر دي.. وسارة سحاب بنتنا برضه.. ياسمين علي وياريت نعرف نرجع مي.. مش انتي مي التانية ويا سلام علي مها البدري..

كفاية سبنا أميرة سالم وسوزان عطية ونادية مصطفي انشغلت بالنقابة وغيرهم وغيرهم وخسرناهم.. بلدنا ولادة يا مي ومواهبنا كتير ومش عايزين نقصر تاني.. إحنا نروح محافظات وعواصم عربية.. ونعمل بروجرام شامل.. 

سوريا إلى الجامعة العربية!

العندليب وصابر الرباعي!

بالمناسبة.. تنفعي للمسرح الاستعراضي بصوتك وبالأداء كويس أوي.. بس ده خلينا نفكر له في خطة لوحدة.. لازم نشتغل في كل إتجاه.. عايزين نرمم وجدان الناس.. ده هيأثر علي معنوياتهم وانتماؤهم طبعا..
قلتي إيه!
كان ذلك أيها السادة وقائع الحلم القصيرالسريع.. الذي رأيته وتمنيت لو حققته كاملا وغيره.. وزيرة الثقافة!