باسم سمرة يكشف تفاصيل مرعبة عن قضائه ليلة شتوية فوق الهرم الأكبر
قال الفنان باسم سمرة: "لو مكنتش ممثل كنت هاكون طباخ وأنا أصلا عيلتي طباخين وشيفات درجة أولى، وموضوع أني أعمل أكلة حلوة والناس تنبسط زي لما أعمل دور تمثيلي حلو والناس تنبسط، وأنا بطبخ كل حاجة كويس وبعمل مندي وصينية بطاطس ومحاشي وكل حاجة ولكن أنا في البيت مراتي هي اللى بتطبخ".
طبخ باسم سمرة
وأضاف خلال الجزء الثاني من لقائه ببرنامج "واحد من الناس" الذي يقدمه الإعلامي عمرو الليثي بقناة "الحياة":"مراتي بتاخد رأيي في الطبخ وأنا بطبخ مع بناتي".
نوم باسم سمرة فوق الهرم
وأكد: "نمت ليلة فوق الهرم، كان ليا صاحب اسمه بورع وده اله الشمس وابوه كان مسميه كده بس احنا علشان دمنا خفيف كنا مسمينه برعي، وصاحبي ده كان كل يوم يجيلي يقولي طلعت الهرم وكان معايا وفد فرنساوي وطلعت بيهم وتاني يوم طلعت بوفد الماني، وفي يوم اترجيته نطلع الهرم الكبير وفعلا طلعنا الهرم الكبير ومبسوطين وبنبص علي بيتنا ويلا ننزل بقى لقيت برعي اتحول اللى ضفدعة طلع أول مرة يطلع ونقلي الخوف بتاعه ودي كانت حاجة سيئة جدا وقاسية لإن فوق مفيش سور ولا مياه ولا أكل ومعانا ربنا بس، وساعتها كان فيه فوق الهرم خشب كده ونمنا ليلة فوق الهرم في ليلة شتوية والهواء هزنا لغاية تاني يوم العساكر طلعوا لنا وشتمونا ونزلونا في اشولة وفي نص الطريق قعدوا يتكلموا عن العقاب اللى هنتعرضله فهربنا وسيبناهم، ولما روحت قعدت اعاني من عدم النوم ليومين لإني كنت كل ما احاول انام احس اني بقع".
فوبيا المرتفعات
وأكمل: "سألت ناس عن الخوف اللى ملازمني بعد طلوعنا الهرم واني مش عارف أنام فقالولي لو مطلعتش تاني هيفضل الخوف من المرتفعات ملازمك، فروحت لصاحبي برعي وقلت له تعالي وطلعنا تاني وبصينا لفوق وبعدين نزلنا تاني".
