عبير صلاح الدين: محمد صبحي جابلي اكتئاب وقررت أسافر كندا في 2015
قالت الفنانة عبير صلاح الدين:"لما عملنا الجزء السادس لمسلسل يوميات ونيس، وجينا نعمل الجزء السابع مكنش ينفع ان احنا نكمله لإن كان فيه مط وتطويل وخلافات بين الممثلين ومحمد صبحي".
مشكلات الجزء السابع ليوميات ونيس
وأضافت خلال لقائها ببرنامج “كلام الناس” المذاع علي قناة “ام بي سي مصر”:"خلال تصوير الجزء السابع من مسلسل يوميات ونيس، حصل فيه مشكلات وتوقف التصوير في 2009 لمدة 6 شهور وخلال الفترة دي الناس اتخانقت مع بعض ومشيوا واضطرينا نعيد التصوير بناس جديدة بدون الحصول علي أجر".
أجواء مسلسل يوميات ونيس
وتابعت:"كملنا الجزء السابع لمسلسل يوميات ونيس واحنا في شد وجذب، وبالرغم من كده كان الفنان محمد صبحي بيقولي انتي عبلة وهتفضلي عبلة اللى في شخصية المسلسل وهتبقى معانا في الجزء الثامن، وقتها كنت متضايقة جدا لأن الأجواء مكنتش كويسة الي جانب ان كان فيه مط وتطويل بدون داعي في الحلقات".
عرض محمد صبحي
ولفتت:"لما خلصنا الجزء السابع اتعرض عليا الجزء الثامن فقلت لأ لإني مش عايزة احرق شخصية عبلة والناس تكرهها".
اصابة عبير صلاح الدين بالاكتئاب
وأكدت:"قعدت من 2010 الي 2015 بحاول اشتغل وكل الابواب بتتقفل في وشي بسبب رفضي المشاركة في الجزء السابع مع محمد صبحي اللى اخد مني موقف لحد لما جالي اكتئاب وقررت اسافر كندا ولسه راجعة مصر من كام يوم، وفيه ناس قالولي لو عايزة تشتغلي روحي استسمحي الاستاذ محمد صبحي علشان ترجعي تشتغلي فرفضت".
موقف صعب من محمد صبحي
وتابعت:"جالي احساس ان محمد صبحي عايز يقولي انا اللى عمتلك نجمة وعملتلك شخصية في يوميات ونيس وانا اللى هموت نجوميتك".
