بعد أجر إرضاع الطفل.. نهاد أبو القمصان: الرسول كان بيخيط ثوبه ويغسل نعله
قالت المحامية نهاد أبو القمصان عضو المجلس القومي لحقوق الإنسان: "هناك نوعان من الزواج في مصر الأول قائم على الشراكة والثاني قائم على الزواج الاستهلاكي كل واحد يبحث عن حقوقه فقط".
رأي الشرع في أجر الرضاعة
وأضافت خلال مداخلة هاتفية ببرنامج "الحكاية" الذي يقدمه الإعلامي عمرو أديب بقناة "إم بي سي مصر": "يا حلو قولي مزاجك وأنا امشي عليه، اللى عايز يمشي علي الحياة العصرية ونبقى شركاء يكمل شراكة للآخر، واللي عايز يكمل لعب ويمشي على مذهب الإمام أبي حنيفة والشرع يدفع مهر وحقوق النفقات بما فيها أجر الرضاعة، ويكمل علي الشرع بكل حذافيره أهلا وسهلا به".
ولفتت: "التصريح عن أجر الرضاعة قديم وده مش كلامي ده كلام ربنا الآية 6 من سورة الطلاق والإمام الشافعي وابن حنبل قالوا إن أجر الرضاعة للزوجة في حال الزواج والطلاق، أما الإمام أبي حنيفة قال أجر الرضاعة في حالة الطلاق فقط".
رأي أبي حنيفة في أجر الرضاعة
وأشارت: "أبو حنيفة قال أجر الرضاعة بعد الطلاق لكن الإمام الشافعي وابن حنبل قالوا أجر الرضاعة في حالة الزواج والطلاق".
تعليق عمرو أديب
وعلق عمرو أديب، قائلا: "لا أبويا ولا أبوكي ولا أخويا ولا أخوكي دفع أجر للرضاعة يا نهاد؟"، لترد أبو القمصان: “ده صحيح، ولكن شوفنا من آبائنا وإخوتنا تقدير واحترام للست وتفهم بينهم، ولكن من يوم ما هب علينا مشايخ الجيمات والإنترنت والحديث عن النشوز والاغتصاب الزوجي الحياة مبقتش زي الأول”|.
هل تطلب نهاد أبو القمصان أجر الرضاعة؟
وتابعت: "أنا مش بطلب من الراجل يدفع لمراته أجر على إرضاع الأطفال، ولكن الهدف بلاش الاجتزاء ناخد من القرآن أو الشرع اللى احنا عايزينه ونسيب اللى مش على مزاجنا، ناخد المنهج كله على بعضه".
وأكملت: "لما قلنا ندفع مهر قالوا مش معانا، طيب السيدة عائشة لما سئلت عن الرسول صلى الله عليه وسلم قالت انه كان بيخيط ثوبه ويغسل نعله بنفسه، البيوت المصرية متستحملش شبكة ومهر ولكن تتجوز مثنى وثلاث ورباع، فيه مليون أم اتطردت هي وأولادها من بيتها في سنة واحدة وفقا لتقرير جهاز التعبئة العامة والإحصاء".
واستطردت: "لو عايز مثنى وثلاث ورباع ادفع اللى عليك يا حبيبي مهر ونفقة الأول".
