انتهاء المزاد على أغلى كارت شحن في مصر بقيمة 11 مليون جنيه
أغلق، منذ قليل، باب سباق مزاد التبرع بين جمعية مرسال وفودافون مصر على كارت شحن فودافون؛ حيث اقتربت قيمة التبرع من 11 مليون جنيه.
حكاية كارت الشحن
ومع نهاية سباق مزاد كارت الشحن قالت هبة راشد فى بوست عبر صفحتها: الحمد لله الذي تتم بنعمته الصالحات.. اللي عملته شركة فودافون Vodafone Egypt درس عملي كبير لكل شركات مصر مش بس شركات الاتصالات عن المسؤولية الاجتماعية ودورها الحقيقي في المجتمع، ودرس في الإدارة وسرعة اتخاذ القرار والمتابعة، قرار زي ده في شركة بحجم فودافون يطلع في كم ساعة ده شيء عظيم جدا.
وأضافت: حقيقي شرف كبير لي ولمرسال إننا نكون شركاء في الحملة دي معكم، وأنتم وش السعد علينا والأهم وش السعد على أطفال الحضانات إلى عمرهم ساعات وأيام ولا حول ولا قوة لهم وهتكونوا سبب في إنقاذ أرواح المئات منهم، وهنتقابل بعد العيد إن شاء الله وأشكركم وجها لوجه.
وتابعت: "شكرا لكل من شارك ولو بجنيه، ولو بشير مكافآتكم الكبيرة عند ربنا، وفي قلوب كل أب وأم ابنه هيدخل حضانات مرسال".
واختتمت: "قبلنا كلنا شكرا للبطلة إلى ربنا بس يعرفها وشرفني إني أكون أنا اللي برد عليها وأتكلم معها، مش بالفلوس يا بطلة ولا بالملايين بالنية الصادقة والقلب المخلص النقي اللي زي قلبك. هنتقابل يوم القيامة إحنا والعيال دول لما يكبروا ويبقوا رجالة وستات وهما هيشكروكي هناك بنفسهم أمام العرش. أعظم حملة عملتها في حياتي".
وقدمت هبة راشد مؤسس جمعية مرسال، صورة لمحادثة بينها وبين فتاة، مساء أمس، ترغب فى التبرع بقيمة كارت شحن، قيمته 10 جنيهات لتيشتعل سباق التبرعات وتصل قيمة التبرعات لسعر الكارت ليصل سعره إلى ما يقرب من 11 مليون جنيه كما دخلت فودافون مصر على الخط لتعلن انها سوف ستتبرع بمثل ما سيتم جمعه للكارت كما أن الفتاه سيتم تعويضها بقيمه 1000 كارت.
وقالت: "وإحنا هنشارك بنفس مبلغ التبرع النهائي مساهمة من مؤسسة ڤودافون مصر لتنمية المجتمع يلا شارك معانا…قدامنا لحد النهارده بليل".. شكرًا للبنوتة الجميلة على مشاعرها الصادقة وليكي عندنا بدل الكارت قيمة ١٠٠٠ كارت".
وقالت الفتاة صاحبة الكارت في رسالتها: "نفسي أتبرع لحالات الحضانات اللي عندك، بس أنا مش معايا فلوس، ومعايا كارت شحن، ومستخدمتوش فينفع أتبرع برقمه واللي يشتريه يحط الفلوس لمرسال"، لتوافق مؤسسة مرسال، وتعلن مزاد على سعر الكارت ليصل سعر الكارت إلى ما يقرب من 11 مليون جنيه، تذهب لصالح الأطفال المبتسرين.
دخول المشاهير
ودخل الكثير من الشركات والمشاهير والمتبرعين علي الخط بالتعليقات المؤيدة والتى تثني علي تلك الخطوة وينتهي السباق ليقترب المبلغ من 11 مليون جنيه، وستتبرع مؤسسة فودافون مصر لتنمية المجتمع بمثلهم.
