نادية الجندي: سبقت عادل إمام في تفجير قضية الإرهاب.. وخرجت من كل فيلم بعاهة | فيديو
قالت الفنانة نادية الجندي: "أفلامي لحد دلوقتي بتتعرض على القنوات، وبتحقق نسب مشاهدة كأنها لسه معروضة النهاردة، وهذا دليل إن أفلامي بتستشرف اللي بيحصل في المستقبل".
تفجير قضية الإرهاب
ولفتت خلال لقائها ببرنامج "كلام الناس" المذاع على قناة "mbc مصر": "استشرفت المستقبل لما عملت عملا عن الإرهاب في الثمانينيات، واتكلمت عن المشكلة دي قبل عادل إمام، وكنت وقتها بدخل في قضية مخيفة ولكنها كانت جرأة شديدة مني وفجرت القضية وقتها".
تعرض نادية الجندي لخلع بالكتف
وأشارت: "في فيلم "اغتيال" كان فيه مشهد جوا العربية، وأنا كنت المفترض سجينة فالعربية بتتقلب وتصطدم بعربية بترول، وأنا صممت أكون داخل العربية اللي بتتقلب، وبعدين اتقلبت العربية فكتفي دخل في صاج العربية ودراعي اتخلع، والمفروض أنى بنزل وأهرب من البوليس، ولكن دراعي اتخلع ومش قادرة أتحرك، والدكتور نصحني أنى ماتحركش، والفيلم كان لازم ينزل في العيد، وكان كله أكشن، ولكن كملت تصوير الفيلم ومشاهد الأكشن والجري بدراعي المخلوع، واتعرض الفيلم وقعدت 4 شهور بدراعي المخلوع".
عاهات نادية الجندي
وتابعت: "في فيلم "جبروت امرأة" جالي حساسية في صدري بسببه ولحد دلوقتي ملزماني، ومفيش فيلم مطلعتش منه بعاهة".
الفاشلين في الوسط الفني
وأكملت: "بيصعبوا عليا الناس الفاشلين في الوسط اللي مبيقدروش يوصلوا للنجاح، وبيكون عندهم غل كبير، وبدل ما يجتهدوا ويشتغلوا على نفسهم بيحقدوا ويحاربوا الناجحين".
