إلهام شاهين: عادل إمام مابيردش على التليفونات.. وزعل منى بسبب أحد الأفلام | فيديو
كشفت الفنانة إلهام شاهين، حقيقة غضب الزعيم عادل إمام منها بسبب الجوائز التى حصلت عليها بعد مشاركتها في فيلم "الهلفوت".
حقيقة حزن عادل إمام
وقالت إلهام شاهين خلال الجزء الثاني من لقائها ببرنامج "شيخ العارفين" المذاع علي قناة "المحور": "عادل إمام أكبر من أي جوائز واحنا حبايب لحد النهاردة وباموت فيه وأستاذ الأساتذة".
نصيحة عادل إمام
وأضافت: "عادل إمام أكبر نجم في مصر، جائزة ايه اللى يزعل منها، واشتغلت معاه بعد فيلم "الهلفوت" فيلم "رمضان فوق البركان" وقتها قاللى ليه قبلتي الدور ده وقتها احترمته وحبيته اكتر وأكتر، فأنا قلت له أنا لو قالولى تعالى عدى من قدام الكاميرا علشان عادل إمام هقبل، فقاللى لأ انتى وإمكانياتك قوية وعملتى دور جامد في الهلفوت انما الدور ده عادي".
آخر مقابلة مع الزعيم وإلهام شاهين
ولفتت: "بقالى مدة مبكلمش عادل امام لإنه هو مابيردش على التليفونات وآخر مرة قابلته كان زوج ابنته عامل سحور رمضان اللى فات".
تصريحات أحمد فلوكس
وردَّت الفنانة إلهام شاهين على الفنان أحمد فلوكس بعد تصريحه ضدها "أتمنى تجهزي رد لربنا عن القبلات لما تقابليه".
أهمية أحمد فلوكس
وقالت إلهام شاهين في الجزء الأول من نفس اللقاء: "إنتو بتعطوا أحمد فلوكس أكبر من أهميته ومش هارد على أي فنان".
إلهام شاهين محامي الفنانين
وتابعت: "أخدت على عاتقي إن أنا محامي الفنانين، ولكن بقول له متربطش الدين بالفن، وقلت له أنا لو عملت واحدة قاتلة هتقول لي ده ضد الدين ولكن أنا مش ههجمه، ومش هوصل لفكرة الفتنة الفنية".
مشكلة أحمد فلوكس
وأكملت إلهام شاهين: "أنا مش عارفة هو ليه بيهاجمني، ويمكن هو عايز يركب التريند لأن الأضواء بعدت شوية، أو يلفت النظر، والغريبة أنهم قالوا لي أنه اعتزل فلما أنت اعتزلت وبقيت بعيد ليه تهاجمني، وقالوا لي أنه نفسيًّا مش مظبط، وبقول له الله يكون في عونك وبيصعب عليا الفنانين، وهو صعبان عليا بجد، ولو تعبان من أي حاجة ربنا معاه".
وقالت الفنانة إلهام شاهين في تصريحات سابقة: "الهجوم الذى تعرضت له بسبب أفيش مسلسل “بطلوع الروح” نجاح للعمل قبل عرضه".
