بشوف سعر اللبس قبل ما أقيسه.. 10 تصريحات لنجيب ساويرس تفاعل معها رواد السوشيال ميديا|فيديو
كشف المهندس نجيب ساويرس، رجل الأعمال، خلال حواره مع قناة “mbc مصر 2”، بعضًا من تفاصيل حياته الخاصة المتعلقة بانتمائه للأهلي وعلاقته بشقيقه المهندس سميح ساويرس الذي يشجع الزمالك، وما يجذبه في الملابس، وأبرز القضايا التي يهتم بها، وتأثير رحيل والده أنسي ساويرس على حياته اليومية، ونصيحته للشباب، والكثير من الأمور الأخري.. وإلى نص اللقاء التليفزيوني الذي تفاعل معه رواد السوشيال ميديا.
قتال نجيب ساويرس ضد التطرف والإرهاب
قال المهندس نجيب ساويرس: "افتخر بمواجهتي وقتالي ضد التطرف والإرهاب حتي لو تعرضت حياتي للخطر".
موقف إنساني لنجيب ساويرس مع عامل بوفيه
وأضاف: "فخور بدعمي لقضايا الفقر والظلم، وأتعاطف جدا مع أي مظلوم وفي إحدي المرات طردت المدير العام لرفضه الاعتذار لعامل البوفيه، ورأيت أنه أهان عامل البوفيه، فطلبت منه الاعتذار له لأنه رجل نوبي وهو من تولى تربيتي منذ 20 سنة، فقام بسبه وشتمه وقال إنه حمار، فرفضت تصرفه وطالبته بالاعتذار له فرفض فقمت بطرده".
تأثير رحيل أنسي ساويرس علي نجيب ساويرس
وعن الذي تغير فيه بعد رحيل والده رجل الأعمال أنسي ساويرس، علق: "مكنش والدي بس ده كان صديق عمري، وهو اتجوز صغير في السن وعمره 23 سنة فكان الفرق بينا صغير أوي، فقضيت حياتي كلها معاه كأعز صديق وكنت أقرب واحد له، اللى اتغير البرنامج اليومي معاه لأني كنت أصحى الصبح أول مكالمة معاه ونتغدا سوا سواء عندي أو عنده، ونخرج بالليل مع بعض، ودلوقتي اصحى الصبح بحس إن فيه حاجة ناقصة، والبرنامج متلخبط".
صفات أنسي ساويرس
وتابع:"اتعلمت من والدي الإصرار والمثابرة وتحدى الصعوبات والاجتهاد والتواضع الشديد، وخفة الدم، والصدق في المعاملة والطيبة والإنسانية".
نصيحة نجيب ساويرس للشباب
وقدم ساويرس رسالة ونصيحة للشباب، قائلا: "متستعجلوش لأن الشباب طالع مستعجل أوي وفاكرين إنهم هيبقوا بسهولة ملياردير، وأنا ابتديت بـ 5 أو 10 آلاف جنيه ومأخدتش فلوس من والدي، وبعد 3 سنين كنت أغني واحد عنده 23 سنة في مصر وعملت 250 ألف دولار".
سر اهتمام نجيب ساويرس بالذهب
وعن سر اهتمامه بالاستثمار في الذهب، أوضح:"مش معظم ثروتي كلها في الذهب ولكن أنا مقتنع أنه ملاذ اَمن وأنا في مرحلة في حياتي مش عايز اعمل فلوس اكتر عايز ابقي مرتاح".
تشجيع الأهلي والزمالك
وعن تشجيع شقيقه رجل الأعمال سميح ساويرس لنادي الزمالك، علق: "بطولات الزمالك الأخيرة بالحظ، وأنا أهلاوي صميم ومعنديش وقت اتكلم مع الزملكاوي، ومبتفرجش مع سميح علي أي ماتش، وهو استايل حياته مختلف عنى تمام لأنه بيلعب بيانو وبيسمع موسيقي كلاسيكي وانا بسمع شعبي وحسن شاكوش فأحنا مختلفين تماما، اهتماماتنا مختلفة تمام".
صداقات نجيب ساويرس
ولفت "ساويرس": "لا يوجد لدي صداقات مع رجال الأعمال وأميل أكثر لأهل الفن والموسيقى والأدب والشعر والرسامين والنحاتين، وقللت ساعات العمل وافضل أن أكون مع أولادي واترك سيرة طيبة بأعمال خيرية".
سر اختيار نجيب ساويرس ملابسه
وعن كيفية اختيار ملابسه، قال "ساويرس": "وأنا صغير كنت بقرأ مجلة ميكي وعندي هوس بميكي وبطوط وعم دهب وبندق وأي تي شيرتات عليها صورهم بلبسها وبحبهم وبتحسسني إني لسه صغير زي قلبي من جوا، وفي النهاية يهمني رأيي أنا.. بشوف سعر اللبس قبل ما بقيسه ولو حاجة غالية أوي وعجباني مش بشتريها، وأولادي والدتهم ماسكة عليهم أوي ومبيقدروش يشتروا ماركات، أمهم شديدة وخايفة عليهم ليبوظوا، وابني بيدرس بقاله 4 سنين وعمره ما رفع السماعة وعايز حاجة وبيركب المترو والأتوبيس ولما مرض وجاله برد في بوسطن اصريت يشتري عربية بـ 11 الف دولار وبعد 3 سنين يرجعها ويأخذ الفرق، وانا كنت باخد اقل مصروف في المدرسة وفي الجامعة اشتغلت في مطاعم ومسحت عربيات لأن الشغل بيعملنا قيمة الفلوس وازاي نعامل الناس البسيطة".
عشاء نجيب ساويرس
وعن مصروفاته اليومية، علق نجيب ساويرس: "أنا مبصرفش كتير لأني بتغدا وبفطر عند والدتي، أما العشاء لو خرجت بصرف 3000 أو 4000 جنيه ودلوقتي الأرقام ضربت خالص وكنا بنخرج الخروجة زمان بـ 30 و50 و100 جنيه دلوقتي الأسعار ارتفعت أوي".
أول مصروف لنجيب ساويرس
وتابع: "أول مصروف أخدته كان 2 جنيه في الشهر وكل اللى معايا في الفصل كانوا بياخدوا 10 جنيه، وأبويا كان بيدينا 2 جنيه علشان يعلمنا نبقي ناشفين وطلعت وجهة نظره صح".
أغنية نجيب ساويرس المفضلة
وعن أكثر أغنية تعبر عن نجيب ساويرس، أشار:"أكتر أغنية بتعبر عني هي "3 دقات".
مهرجان الجونة
وعن مهرجان الجونة السينمائي، أوضح: الحديث عن إقالة انتشال التميمي غير صحيح والمهرجان يعتمد بشكل أساسي على وجوده، والمهرجان لم يتأثر بمغادرة أو إقالة أي أشخاص.
