غراب البين: المقاول الهارب محمد على هيخربها واحنا اللى هنرقص على تلالها

امبارح فى وسط البلد وأمام المقهى اللى بيقولوا عليه بتاع المثقفين من الكتاب والصحفيين كنت واقف على الشجره لا بيا ولا عليا والدنيا ليل ومش عايز انعق ولا افتح بُقى علشان الكام واحد اللى قاعدين بيشيشوا ومبسوطين ما يتشائموش منى والليله تبوظ

لكنى سمعت البنت المرووشه اللى بتيجى كل يوم وهى بتقول لزميلها أبو ضفيره أطول من ضفيرة صاحبته اللى قاعده بتشيش وتنفخ فى وجهه وتقول: يا سلام لو الدعوه بتاعت "محمد على" لقت صدى والناس نزلت يوم 20-9 دى هتبقى ليله يا عمده

الواد قالها: ياستى احنا مالنا ومال محمد على.. وثانيا الإخوان هيركبوا الموجه ويرجعوا يقرفونا تانى

قالت: يا عم سيبهم يركبوا واحنا نبقى نمشيهم ماهم كانوا راكبين ومشيوا زى الخرفان ولا انت نسيت؟!

قالها: طب وانتى عايزه تكررى المسلسل ليه طالما النتيجه واحده

قالت له: عادى يعنى.. اصل عندى فراغ وعايزه أملاه.. وحشتنى أيام الفوضى والشعارات الرنانه.. دا غير انى هرجع امارس دورى كناشطه سياسيه.. يعنى انت عاجبك إن منصب ناشط سياسى يتمحى من الوجود بالشكل ده؟!

الواد بص يمين وشمال وقالها: بس كدا هنرجع للنقطه صفر وهنحتاج نعمر ونبنى من جديد

قالت: يا إبنى كفايه إن البرامج السياسيه هترجع تانى واكيد احنا هنبقى ضيوف دائمين والمواقع تاخد تصريحاتنا والناشط السياسى فلان قال والناشط السياسى علان قال.. ونرجع نقبض بالدولار من القنوات زى زمان

الواد قالها: طب والشعب اللى عايز يعيش وضعه إيه فى القصه دى

قالت: يتحرق الشعب ويولع بجاز.. هو احنا أخدنا إيه من الشعب لما عملنا ثورة يناير وشيلنالهم مبارك

وهنا نفشت ريشى وأخذت انعق قاق قاق وكل اللى قاعدين رفعوا راسهم لفوق وشتمونى وقال إيه بيهشونى علشان أمشى وبيقولولى غور يا غراب البين من هنا

طب يا شوية بنى آدمين متشوفوا الحدايه اللى قاعده معاكم دى وغراب البين اللى بيسمعلها من غير حتى ما ينعق ولا يقول قاق.. ماهو لو محمد على هيخربها يبقى احنا اللى هنرقصلكم على تلالها ومعانا شوية النشطاء السياسيين اللى ألعن مننا وبينشروا السم بين الناس والفرق الوحيد بينهم وبيننا إنهم مش بينعقوا ولا بيقولوا قاق قاق!