شنطح محتاس عامل فيها زعيم حساس..| ساخرون

شلاليت



عمك شنطح جالك ينطح تدي له إيه؟
ادي له مركز فيه يتمركز يقعد فيه
أصل الحاجة مش محتاجة
بعد الثورة نقعد تاني ونسكت ليه



عمك شنطح قايم نايم كده محتاس
كل شوية عامل فيها زعيم حساس
وعندما نكشف أمره بيهرب
ويقف يخطب بين الناس




عمك شنطح له شبيحة لفوضي كتير
كل شوية واقفة تصوصو كالعصافير
وإن قلنا لهم إن كلامكم يوجع راسنا
يطلع شنطح ويقول إحنا بتوع تغيير



إحنا تعبنا ياشنطح منك من أفعالك
وإن ما رحلتش من قدامنا طول بالك
بُكرة حتندم ريح نفسك واقعد فكر
إن الدنيا بترفض تسمع كل كلامك




بطل تخطب كل شوية خطبة طويلة
تشطح تنطح والحالة تفضل زي النيلة
أنت مفكر إن الدنيا كلام في كلام
لأ يامعلم يظهر إنك في التعسيلة




أنا حذرتك وأنت الجاني يامستر شنطح
كل شوية عمال تخطب فينا وتنطح
أنت مفكر إن كلامك أثر فينا
أصل أنا خايف صبرنا يخلص منا ويطفح