خاص.. «خلصنا الورث كله» نجل شعبولا يرد على منار اللبنانية بأغنية على طريقة والده | فيديو

فجر المطرب الشعبي عصام شعبان عبد الرحيم، نجل الراحل شعبان عبد الرحيم مفاجأة، بطرح أغنية جديدة بعنوان «خلصنا الورث كله»، للرد على المطربة منار اللبنانية، بعدما طالبت مؤخراً بحقها في الميراث.

وأغنية «خلصنا الورث كله»، من تأليف خالد سعيد، توزيع طه الحكيم، لحن الراحل شعبان عبد الرحيم، مهندس صوت حسام جودة.

وتقول كلمات الأغنية، التي اختص نجل شعبولا "فيتو" بنشرها: «شايفين منار ياعالم بعد ما فاتت سنة، قامت من النوم وعايزة تقسمنا في ورثنا، منار اللبنانية قال عايزة حقها، هو أنتي أختنا يعني بأمارة إيه دليني، ولا اتجوزتي أبويا وأنا ناسي فكريني».

وتقول أيضاً: «ورينا إثباتاتك وتبقي 100 100، يا منار تبقي أنتي شاطرة وكلك مجدعة، وريني أي دليل لو ورقة مقطعة، لو واحدة يعني اتصورت مع أبويا وقالت عايزة ورثي ده يبقى جنان يا أخويا، عايزة ورثك حقيقي ده بجد ولا هزار، ده أبويا ما اتجوزش غير أمي يا منار خلصنا الورث كله وخلصت الفلوس وفي رمضان اللي جاي أنا هبعتلك فانوس، يا منار كان بنا عشرة لو فاكرة من زمان، اكدبي على الناس براحتك، بس انسي ولاد شعبان بس خلاص».



وكانت الفنانة منار اللبنانية اختصت موقع "فيتو" بفيديو صورته في لبنان، لتأكيد حقها في ميراث المطرب الشعبي الراحل شعبان عبد الرحيم، بعد نفي أبناء المطرب ذلك، مقدمة الشكر لموقع "فيتو" على توضيحة لموقفها ووجهة نظرها أمام الجمهور.

وقالت "منار"، خلال الفيديو: «أنا ساكتة وهتكلم في الوقت المناسب عند الوصول إلى مصر قريباً لإنهاء إجراءات الميراث وحقي في الفيلا التي تركها شعبان».



وأضافت: "وصلني اليوم فيديو من عصام شعبان عبد الرحيم، ينفي حقي في امتلاك الفيلا، وأنا أعيد وأكرر، أنتو ولاد شعبان عبد الرحيم إخواتي، الراجل اللي وقف جمبي".

واختتمت: «كنت في نيويورك لما مات شعبولا، وبعد ما عرفت بفترة تحدثت وفي تفاصيل كتير لا بد من الحديث فيها قريب عقب وصولي مصر».

وكانت «فيتو» انفردت مؤخراً، بأزمة حديث الفنانة منار اللبنانية عن أحقيتها في امتلاك الفيلا، وميراثها من شعبان، ورد عليها نجله الأكبر عصام شعبان عبد الرحيم، لنفي كل ما قالته.

وأكدت منار فى تصريحات خاصة لـ«فيتو»، أنها لم تكن تعلم بورثها الفيلا من شعبان عبد الرحيم الشهور الماضية، موضحة أنها أثناء وفاته كانت تتواجد بأمريكا.

وتابعت: "أنا ما كنتش أعرف حاجة بس محامي شعبان عبد الرحيم كلمني وبعت لي المستندات بس في مشاكل فى العائلة، وعصام رافض يديني الحاجة".

وأضافت: "لو لي حق هاخده بالقانون، أنا منتظرة عشان آجي مصر، وفي خلافات بيني وبين عصام وفي نفس الوقت هو أخويا، وأنا مش هخسره هو وأخواته عشان الفيلا".

وبسؤالها عن حقيقة زواجها من شعبان عبد الرحيم قالت: "هو لو عندكم في مصر شخص قدم لشخص حاجة لازم يكون متزوج منه، في الحقيقة أنا مش متجوزة منه، هو شخص كريم وقدم هدية لي، شعبان كان بمثابة الأب الروحي ليا".

وأردفت: "أنا لحد دلوقت مصدومة، وعصام حاول يخبي الموضوع، وأنا منتظرة أعود لمصر عشان أشوف بلدي التانية وعشان أشوف موضوع الفيلا أيضًا".

على الجانب الآخر، حرصت «فيتو»، على التواصل مع عصام شعبان عبد الرحيم، لمعرفة حقيقة الأمر والوقوف بشكل كامل على تفاصيل الواقعة، وقال لـ"فيتو": "أنا أول مرة أسمع الكلام ده، ومش فاهم حاجة بصراحة ومصدوم لأن مش عارف هي لها حق فى ورث أبويا على أي أساس".

وأضاف: "هي بتقول معاها مستندات وأوراق بتثبت إن ليها حق فى الورث، وأنا لو أبويا الله يرحمه عمل كدة فعلًا وكتب حاجة ليها مش هقدر أكسر كلمته فى طربته، لأن فى النهاية هما عشرة وأبويا كان بيحبهم ومعتبرهم أسرة واحد، وإحنا زي الحاج شعبان عبد الرحيم مش بنحب المشاكل خالص".