كهربا: أنا أكتر واحد تعرض للسب في الزمالك.. ومرتضى منصور كان عايزني أسكت على شتيمة أمي

قال محمود عبد المنعم كهربا، لاعب النادي الأهلي: "أنا أكتر لاعب اتشتم في نادي الزمالك وأنا بلعب في الزمالك حتى بعد إحرازي الأهداف، وكنت باستحمل كتير ومكنتش عارف سبب شتائمهم لي، وكنت علطول في مشكلات مع مرتضى منصور لأنه كان علطول بيتكلم عليا بشكل مش كويس قدام اللاعيبة".
 
وأضاف خلال لقائه ببرنامج "ملعب أون تايم" الذي يقدمه سيف زاهر بقناة "أون تايم سبورت": "كثرة مشكلاتي مع مرتضى منصور كانت بسبب المحيطين به.. وكان بيقولي لو حد شتمك في الماتش بأمك أو أبوك متعمليش فيها بقى مجنون، وقتها قلت له: "والدي ووالدتي أهم حاجة والكلام ده يتمسح من الفيديو، وفضل يشوحلي".

وتابع: "وقتها شتمت جامد، وخرجت لقيت مرتضى منصور في وشي وقاللى أنا مش هسيبك وتعالى على مكتبي وجابلي عصير ليمون وقاللي اهدى وإنت ابني واتصالحنا".