مؤلف "ونحب تاني ليه": أتمنى محدش يزعل من نهاية المسلسل
عبر السيناريست عمرو محمود ياسين، عبر صفحته الشخصية على موقع "فيس بوك"، عن سعادته بردود فعل الجمهور على مسلسل "ونحب تاني ليه"، والذي يعرض خلال شهر رمضان الجاري.
وكتب عمرو محمود ياسين، قائلا: "آخر حلقة من ونحب تانى ليه.. أنا سعدت جدا بالحالة الجميلة اللى عشتها معاكم خلال فترة عرض المسلسل.. وفرحت أكتر بحالة النقاش والجدال حوالين فكرة هى غاليه المفروض تعمل ايه.. عبد الله ولا مراد.. واتبسطت إن قدرت أحقق حالة تشويق فى مسلسل رومانسى اجتماعى، يمكن فى مسلسلات ساسبنس معروف نهايتها من أول اسبوع".
وأضاف: "اتسبطت إنى قدرت أطرح عليكم تساؤلات حول وضع المرأة المطلقة فى مجتمعنا، وإيه اللى لازم تعمله وإزاى يفترض أن ينظر لها المجتمع، اتبسطت إنى شاورت على فكرة الحب وأهميته فى حياتنا سواء مع شخص جديد أو من خلال فتح صفحة جديدة والتسامح مع شخص أخطأ فى حقنا، إفشاء الحب عموما بين الأخوات وبين الأصدقاء، التسامح مع الآخر، إعادة النظر فى أفكارنا وفى تابوهاتنا".
وتابع: "يعنى المهم.. أيا كان النهاية، أتمنى محدش يزعل منها وتقبلوها زى ما هى، لأن هتبقى دى رؤيتى أنا وفريق عمل المسلسل كله، ونلتقى بعد نهاية الحلقة اللى هتشهد أحداث كتير.. شكرا لحسن متابعتكم وكل سنة وانتو طيبين".
