ملطشة القلوب
فكرة الجواز الأيام دي جايز تبان قرار صعب أو تبان في بعض الأحيان انتحار، وجايز اللي يشوفها في وقت من الأوقات نوع من أنواع الجنون. لكن لو فكرنا فيها مع الوقت هنكتشف إن حتى لو خطوة الجواز نوع من أنواع الجنون هيكون جنان حلو بس لو مع الشريك المناسب أو الصح. وخصوصا أن في وقت من الأوقات جايز الشريك يخليك تغني زي ما قال مصطفى شوقي في أغنيته المشهورة "ملطشة القلوب" وتقول لقلبك إنه جلاب المصايب.
اقرأ أيضا : "الكوتشنج" في مصر
الارتباط في الأصل لما بدأ، ربنا كان يقصد بيه أن يكون لآدم معينا نظيرا زي ما اتكتب في سفر التكوين الاصحاح التاني في قصة خلق حواء. لكن السؤال اللي بيفضل مطروح، هل اخترت شريك الحياة الصح والمناسب؟ اخترت اللي يصون قلبك ويحميك ويكمل معاك طريقك في كل حاجة، ولا اللي يخليه ملطشة القلوب؟
اقرأ أيضا: صلاح فضل الخولي عبدالله
ومش شرط أن كل اللي حواليك بيتجوزوا أو متجوزين تتسرع في الاختيار أو الجواز، الأكلة الحلوة دايما بتاخد وقت وتفاصيل علشان تطلع مظبوطة، جايز بتتأخر بس بتكون زي أكل البيت، يدخل يربع جوا منك، عكس اكل الشارع السريع. متفرحش لو لقيت حد "سد خانة" الاحتياج العاطفي في حياتك، لكن افرح لو لقيت اللي يصون قلبك وميخلهوش "ملطشة القلوب".
