محمد ممدوح لمنتقديه: بدأت أعالج مشكلتي وياريت تصبروا عليا
قرر الفنان محمد ممدوح إنشاء صفحة رسمية على موقع التواصل الاجتماعي "فيس بوك"، بعد أن نسبت بعض الصفحات كلامًا على لسانه في الفترة الأخيرة.
وكتب الفنان الشهير بـ"تايسون"، والذي تألق في مسلسلي "ولد الغلابة" و"قابيل" منذ قليل عبر الصفحة قائلًا: "في اليومين اللى فاتوا فيه أكتر من صفحة انتحلوا شخصيتى وبدءوا يتكلموا بلساني في أكتر من موضوع وخصوصًا موضوع نبرة صوتي، علشان كده قررت أنشئ الصفحة دي وتكون صفحتي الرسمية الوحيدة على فيس بوك".
تابع "ممدوح": يا جماعة أنا عمري ما كنت عنيد، وخصوصا فيما يتعلق بشغلي وبيكم، أنا عارف إني عندي مشكلة، ولكن هناك بعض المشكلات الصحية اللي بتاخد وقت طويل في علاجها، وخصوصا إذا كنت بتعالج المشكلة وأنت بالفعل بتشتغل، أنا حابب أفرحكم وأعرفكم إني بالفعل بدأت أعالج الموضوع، بس محتاج وقت، فياريت تصبروا عليا لأن فعلا الموضوع مش سهل، ومش هيتحل في يوم وليلة ولا حتى سنة، ومرة تانية.. أنا آسف ورمضان كريم.. محمد ممدوح".
وكان الفنان محمد ممدوح تعرض لانتقادات من البعض فيما يتعلق بقصر نفسه، أو بعض مخارج الحروف، وخرج ممدوح في برنامج "تفاعلكم" على قناة "العربية"، متأسفا للجمهور، الأمر الذي أكسب الفنان الموهوب تعاطفا كبيرا من الجمهور عبر مختلف وسائل التواصل الاجتماعي.
