الطب بين الـ«+١٨» ومساعدة الناس

لما جيت روسيا من سنة في أول محاضرة خدتها في الكلية قالوا لنا لما تتخرج من هنا عليك أنك تقرر، يا إما تكون سببا في شفا الناس وأنهم يبتسموا لما يفتكروك، أو أنك تكون سببا في زيادة الألم ليهم ولما سيرتك تيجي يوصفوك بأسوأ الصفات في الدنيا.

خلال الأيام اللي فاتوا شوفت كام نموذج من الأطباء الصراحة كلهم عكس بعض، كل واحد قرر ياخد الطب لحاجة مختلفة، وبالطبع لن نذكر الأسماء السلبية علشان مش مهمتي أنا أني أفضح الفساد ده، وده مش موقف سلبي، قد ما هو ستر، وأن المفروض الدور ده اللي تقوم بيه الجهات المعنية في مصر.

أول دكتور، هو دكتور -والله أعلم إن كان صادق في دي ولا لا؟- نفساني، وقرر أنه يتخصص علشان يساعد الشباب في سن المراهقة، طبعًا لحد هنا الموضوع كويس ويشكر الراجل الصراحة، أنه حاول يساعد الشباب في الفترة دي، وخصوصًا أن الفترة دي بتبقى فترة صعبة على الشباب، لأنها مرحلة تكوين شخصيتهم وفترة على رأي ويليام شيكسبير، مرحلة "أكون أو لا أكون".

بس لما يتحول الموضوع لأنه بيعمل كده وكمان بيتكلم بآيات من كتب ربنا علشان يدعم مواضيعه ومحاضراته دايمًا للشباب ويحسسهم قد ايه أنه جميل ويستحق الثقة، فيخون الثقة ويتحول لذئب بشري ماشي على رجليه ولكن في عقول الشباب وخصوصًا الفتيات علشان يحقق مطامع أظن أنك فهمتها دلوقتي، يبقى الوضع مؤسف أوي.

تخيل عزيزي القارئ تيجي بنتك في يوم وتقولك، بابا أنا رايحة لدكتور نفساني علشان عندي اكتئاب وضغوط من الثانوية العامة، فتقولها طبعًا يا حبيبتي روحي، وتروح وتبتدي تتابع معاه، وهوب في مرة واحدة، أثناء جلسة يوهمها بعد جلسة عياط طويلة من البنت، أنها محتاجة مهدئ وبعد ما تاخده تفقد السيطرة في التحكم في جسمها ويجي هنا دوره..ويبدأ في التحرش بها.

ولما تيجي تقولك، طبعًا، هتتعصب وتحاول تهد الدنيا، ولكن للأسف، مفيش حاجة تقدر تثبتها ضده، فتدمر أنت أكتر والبنت أكتر وأكتر.

للأسف بنتخدع باللي بيكلمونا بالكلام الحلو ومن جواهم ميكونوش صافيين، وبننخدع أكتر في اللي بيزوق كلامه بكلمتين حلوين عن ربنا، ودول بالظبط عاملين زي ما قال عمنا نجيب محفوظ، لا تخدعك عبارة العدل أساس الملك في المحاكم، أعرف كثيرأً من اللصوص يضعون على مكاتبهم هذا من فضل ربي.

نيجي للطبيب التاني والصراحة ده اللي ضحكني جدًا، دكتور عمل صفحة على فيس بوك وابتدى يدي نصايح من المفترض أنها طبية ولكنها غريبة ومدهشة الصراحة، أهمها علاج السرطان، كل الناس في العالم بتدور على علاج للسرطان، وسايبين الدكتور العظيم ده باكتشافه العظيم ده من غير ما يستغلوه. قالك ايه الدكتور العبقري ده؟، قالك علاج السرطان أنك تستحمى بمياه وملح كل يوم لمدة أسبوع، وبعد الأسبوع ده مش هتلاقي أثر للسرطان تمامًا.

ولكن الكوميديا السوداء موقفتش لحد هنا، الكوميديا استمرت بأنه قالك، أن أي عضو في جسم الإنسان تلف، يقدر يعالجه بأنه يأكل العضو اللي زيه في جسم البهايم، آه والله، زي ما أنت قرأت كده، وهذه المعلومة الحقيقية استوقفتني كثيرًا، لما يكون واحدة عندها عقم أو مش بتخلف، تاكل أيه وقتها؟، أو السؤال الأكثر إلحاحًا في نفسي، لو واحد عنده ضعف جنسي يأكل إيه؟.

ولكن وسط كل المهازل دي، لقيت "بسمة أمل" تقول أن لسة الدنيا بخير، تقول لسة فيه ناس فاهمين المهنة صح، عارفين يعني أيه طب؟، فاهمين يعني أيه أن الدكتور أداة في ايد ربنا علشان يخفف الناس، مش يستخف بعقول الناس.

بالصدفة تعرفت على طبيبة اتزان وسمع تدعى دكتورة منى العقاد، دكتورة منى بتعمل ايه بقى؟ هقولك بتعمل إيه؟، أولًا لو أنت مش قادر على الدفع فأنت تقدر تخش تكشف وتتعالج وببلاش، كنوع من الصدقة الجارية على روح والدتها.

الموضوع ممكن يبان لطيف شوية ولكن خليني كمان أوضحلك قد أيه الموضوع لطيف كمان، بأنك في العيادة مش مريض، لا أنت ضيف ومن حقك تطلب مشروبك كواجب من الضيافة وكمان فيه منطقة مجهزة للأطفال صغيرة علشان يلعبوا.

الموضوع وقف لحد هنا؟، لا، دي كمان بتساعد الأطفال المميزين أصحاب حالة دارون، وعملت زي مبادرة بتدعم فيها الأطفال دي وأهاليهم كمان، علشان يقدروا يعيشوا سعداء ومبسوطين في حياتهم. يمكن مقولتش اسم أول اتنين دكاترة لأن المفروض مفضحش الوحش، بس من واجبي أشيد بالحلو، وأقوله شكرًا على أنك موجود وعلى أنك بتساعد وبتقدم حاجة تنفع الناس صح.

شكرًا دكتورة منى العقاد، وأسف على حال الأطباء الآخرين وعلى حال كل دكتور يشبهم، وأتمنى لو يبقى فيه توعية بأن المهنة دي مهنة عظيمة مينفعش أي حد يستغلها بشكل يسيء ليها.