كي تحبك هي (3)
عمرك فكرت في أنك ممكن تكون بتسبب إرهابا لشريك حياتك؟، طب أنت عارف إنه زي ما فيه إرهاب ديني وسياسي فيه إرهاب عاطفي؟، طب أنت عارف أن الإرهاب العاطفي ده منتشر وبكثرة في أغلب العلاقات حاليًا؟
في البداية خليني أقولك إنك بتبقى فاكر لما بتقول لشريكة حياتك إنت لو فضلتي تعملي كذا أو فضلتي على كده أنا هضطر أنسحب من العلاقة ده تهديد وإرهاب ومش هيحل المشكلة خالص على عكس ما أنت متصور أو متخيل!، طب تعرف أنك لما بتبخل على شريك حياتك بالكلمة الحلوة وبتختصرها بس في المناسبات ده برضو نوع من أنواع الإرهاب العاطفي؟ لأنك ببساطة لما بتبخل بالكلام والأفعال الطيبة وتشوفك حلو وجنتل مع اللي برة، بتتأكد على طول أنك بتبص برة وهتروح منها!
كنت قلت في المقال الأول في السلسلة دي أن المرأة أول حاجة بتدور عليها في العلاقة هي الأمان، وهي أن لقت اللي بتدور عليه ده أضمن أنك تملك الجنة وما فيها رغم أنك لسة ع الأرض بينا!
البنت دايمًا بتدور ع اللي يقولها أنا جنبك اطمني ومش هسيبك، مش مع أول مشكلة أو حتى المشكلة المليون يقولها هضطر أنسحب من العلاقة!، معاك أن لكل إنسان طاقة تحمل، بس برضو هي إنسان ومن حقها تحس بالأمان.
العلاقات العاطفية بتبقى قايمة على فكرة الاحتياج، يعني البنت بتبقى محتاجة للأمان فبتحبك علشان حست معاك بالأمان ده فحاول توفره ليها مش تاخده منها وتكسر قلبها، وتسأل بعد كده هما نكد ليه!
الطبيعي أن ليك حقوق وواجبات في العلاقة، فطبيعي قبل ما تطلب منها أنها تديلك حقوقك اللي عاوزها من العلاقة دي، أديها الواجب الوحيد اللي عليك وهو أنك تحسسها بالأمان وتقولها أنا فعلًا جنبك وبحبك وعاوزك وأنك مستحيل تمشي وتسيبها علشان خاطر أي مشكلة سواء تافهة أو كبيرة لو فعلًا أنت بتحبها!
Twitter.com/PaulaWagih
