كي تحبك هي (٢)
لما بتقرر إنك تصارح بنت بحبك بتبقى لسه بتحط رجلك على شبكة فخ، أغلبنا كرجالة بيقعوا فيه!، أه والله!، مع إنه فخ حرفيًا سهل عدم الوقوع فيه، والفخ ده هو خلينا صحاب!، طبعًا انتشرت الفترة الأخيرة سخرية من الجملة دي وطلعلها مصطلح مخصوص اسمه «فريند زوون» أو منطقة الصحاب بمعنى أدق، مع أن البنت حرفيًا مبيبقاش قصدها تحطك في المنطقة دي، بس هي بتحطك علشان حاجة تانية.
اتكلمت في المقال الأول اللي كان اسمه "كي تحبك هي (١)" على أن البنت بطبعها بتتحكم فيها المشاعر أكتر من العقل، فبتخاف أنها تخش في العلاقة على طول، خوفًا من أنك «كراجل» والمفروض تكون ليها سند تيجي في يوم وتجرحها، وساعتها حرفيًا هتكره قلبها إنه مال ليك في يوم من الأيام!
طبعًا أغلبنا لما بيسمع كلمة خلينا أصحاب، بيحس إنه هيخش المنطقة إياها فيخاف ويكش ويبعد عنها بهدوء لحد ما يختفي من حياتها بس بيختفي بالتدريج، وساعتها فعلًا بتثبتلها إن خوفها ده كان عين العقل!، أه والله!
البنت علشان المشاعر بتتحكم فيها أكتر فهي ممكن تكون بتخاف من العلاقات كلها بشكل عام!، حتى لو علشان جارتهم اللي ملهاش أي كلام معاها، بتتعامل بطريقة مش حلوة من جوزها، أو صاحباتها بيحكوا ليها عن إنهم مش مرتاحين في علاقاتهم، أو مرت بتجربة سيئة، كل دي عوامل بتخلي البنت حرفيًا مش قادرة تملكك قلبها مجرد ما تطلبه!
يا راجل، ده لو فريق الكرة اللي بتشجعه خسر بتكره الدنيا وما فيها، ما بالك بإنسانة ممكن قلبها اتجرح في وقت من الأوقات!، مش بذمتك لازم تخاف في بداية العلاقة؟؟.
لما تخاف وتقولك خلينا صحاب، متخافش وكمل وهي لو حسيت إنك فعلًا شاريها وبتحبها قلبها هيميل لك في يوم، القلب بيحس بأي حد بيحبه، ولو لقاه، عمره ما بيفرط فيه.
Twitter.com/PaulaWagih
