عملاء يفتحون النار على «كريم»: السواقين بتاكل علينا الفكة والخدمة سيئة
شن مستخدمو شركة "كريم" الإماراتية العاملة في مصر، على صفحة الشركة عبر "فيس بوك"، هجومًا حادًا على سوء الخدمة المقدمة لهم خلال ركوبهم سيارات الشركة.
وقال Ahmed Eldeeb: «أنا طلبت كريم من الساعة 2:50 وكان كاتب قدامي 5 دقائق ويوصل والكابتن وصل الساعة 3.5 ومش من المكان اللى أنا طلبه منه عشان ميتهوش تاني وكنت رايح سيدي جابر عشان قطار وطبعا ملحقتوش أنا مستخدم كريم كذا مرة بس المرة ديه كانت سيئة جدا ومش هنصح حد بيه بصراحة وأكيد هيبان في تفاصيل الرحلة.. ولن أتعامل مع كريم مرة أخرى».
فيما انتقدت Sara Sa'eed الشركة قائلة: «لو سمحت أنا طلبت كريم أمس وأنا في downtown مرة والراجل كان بعيد جدًا عني وكنسلته في أقل من دقيقة وطلبت تاني جالي برضو واحد بعيد جدا وكنسلته وبعد ماروحت لقيته خصم مني ٢٣ جنيه وأنا أصلا مجاليش أنه هيخصم حاجة !! ومش أول مرة استخدم كريم يعني بس ده بجد نصب جدا ياريت حد يرد عليا».
وقدم Hashem Khalifa شكوي من نظام GPS في التطبيق الخاص بكريم قائلًا: « الـــgps عندكم فيه مشكلة ياجماعة بيفضل مسجل آخر مكان وأوقات بيجيبني في مكان تاني غير اللي بحدد إني فيه.. مرة كنت في مكرم عبيد وراسه وألف سيف إني في أحمد فخري».
كما اشتكى Ahmad Safwat من عدم حصوله على باقي الأجرة «الفكة»: «أنا السائق بتاعكم أخد مني فلوس وماحطهاش في المحفظة وباعتلكوا كذا مرة ومش بتردوا واتصلت بيكوا ومحدش بيرد إيه الإهمال ده؟».
وأيدت Reham Hosny شكوي «الفكة» قائلة: «هو إللى عاوز يتواصل معاكم يعمل إيه لأن انا اتسحب من حسابى فلوس وكمان كنت راكبه مع حد يوم الخميس واديته فلوس ومكنش معاه فكه وقالى هنزلها في حسابك ومفيش حاجه نزلت في الحساب المفروض أنا أعمل إيه أمسح التطبيق خالص وأريح نفسى وإلا أنتم المفروض تحلوها لأنها حصلت برضو معايا قبل كده وموصلتش برضو لأى حاجة».
أما Nouran Wahid Khadr فاشتكت من تدني مستوى الخدمة قائلة: «بجد بقيتو أسوأ مايمكن وفعلا مش هاتعامل معاكم تاني لأني كل ماتحصل مشكلة من كابتن (... و...) ومش (....) مابتهتموش أصلا ومعنا كده انكم مش فارق معاكم إنكم يبقوا الكابتن بتوعكم كويسين ومش فارق معاكم تخسروا ناس بتتعامل معاكم، بعتالكم إيميلات ورسائل بأكثر من مشكلة وماحدش اهتم».
فيما ردت شركة "كريم" على استفسارات ومشكلات العملاء ووعدت بحلها في أقرب وقت.
