عن المشاغب «أبو طالب»
من كام يوم واحد من الناس اللي بحب إرادتهم وعزيمتهم وحبهم للحياة جدًا اتعرض لمشكلة، في الوقت اللي كان في ناس عاوزة تنزل الشارع تعترض على موضوع الجزيرتين بتوع "تيران وصنافير".
الشخص ده هو "محمد أبو طالب" واللي يعتبر واحدًا من الشخصيات اللي تحب تلاقي ناس كتير زيه في الدنيا كده علشان يحسسوك أن مفيش مستحيل وأنك لو فاكر أن المستحيل موجود فهو موجود لأنك أنت اللي وجدته.
"محمد أبو طالب" من الناس اللي مبتحبش أي حد يساعدها في حركتها فبيستخدم العصاية البيضاء اللي بتعوضه عن بصره؛ المهم أنه اليوم اللي الناس قالوا هينزلوا يعترضوا فيه على موضوع الجزيرتين قال أكيد الجو هيبقي رايق والناس كلها هتخاف هنزل أتمشى شوية فاستخدم عكازه ومشي لحد ما حصلت المشكلة اللي كانت مع الشرطة حسب كلامه واللي كان اتكلم عنها كاملةَ في بوست - post على فيس بوك.
الغريبة أو اللي شدني تعليقاتنا كمصريين على إعاقته؛ اللي يقوله يا سلام عاوز تقنعني أنك".... "وعارف تكتب كل ده؟! أو... وكاتب كل ده؟! ده أنا مفتح ومش عارف أقرأ كل ده!!
وكلام كتير من هذا المجمل اللي ممكن يخلي أي حد يندم على وجوده في الحياة؛ على فكرة هو مكانش طلب منك تقرأ البوست اللي كان كاتبه! أو حتى أتحايل عليك علشان تقرأه.
المدهش أكتر في الموضوع أن تاني يوم للحادثة دي كتب بوست برضه على فيس بوك بيقول إن الشرطة اعتذرت له يعني ببساطة الراجل لو كان كداب مكانوش هيكلفوا نفسهم حتى ويسألوا فيه!
ثم إيه المدهش في أنه يكون ربنا أخد منه نعمة البصر بس قادر يعيش زي ما حضرتك قادر تعيش؟! أنا في يوم من الأيام كنت محروم من المشي وكان صاحبي الكرسي المتحرك أو السرير بس الصراحة مكنتش شايفة إعاقة ليا بالعكس ده كان إحدى أهم الحاجات اللي ساعدتني أني أنجح وأحقق كل اللي نفسي فيه.
ياريت متظنش دايمًا السيئ في اللي حواليك وأفترض دايمًا حسن الظن بيهم وصدقني الكلام بيبقي عامل زي الشيكولاتة حاول تطلع شيكولاتة بالبندق (كلام حلو) لو عاوز فعلًا تسيب أثر طيب وبلاش الشيكولاتة بالصراصير (الكلام اللي مش قد كده) لو أنت متحبش حد يأكلهالك (يسمعهولك).
وصدقني أبو طالب أو أي حد ربنا خد منه أي حاسة أو أي حاجة مهمة في جسمه ده في حد ذاته دليل على أنه مميز جدًا وأن ربنا شاف أنه يقدر يعيش من غيرها وأنه قوي وأنه مش هقول إنه يقدر يستغنى عنها بس أكيد يقدر يتكيف مع الحياة حتى وهي مش موجودة.
بجد بعتذرلك يا أبو طالب عن أي كلمة زعلتك وصدقني نفسي كل الناس تتعلم منك أن المستحيل موجود جوانا.. بس لو حبينا فعلًا نتغلب عليه هنقدر بس إحنا نعوز ده ونحاول نشتغل.. فتغلب عليه.
