الدرس انتهى
بما أن النهاردة أول يوم في شهر يناير من العام الجديد وهو تاريخ قراء حضرتك لمقالي ده فأحب أقول لحضرتك إنك قدرت تهرب من نكسات السنة اللي فاتت اللي لسة مودعينها من كام ساعة اللي هي سنة 2015.
في 2015 اتعلمت دروس كتير واستفدت من مواقف كتير جدًا حصلتلي وطلعت بناس كتير حلوين بس في المقال ده حابب أتكلم في الدروس اللي اتعلمتها في 2015.
1- إياك تتعلق بأي شخص بزيادة لأن في أغلب العلاقات بيبقى أحد الطرفين مستعد يعمل كل اللي وسعه علشان يفضل على التاني مهما كانت نوع العلاقة (حب - صداقة - أخوة) وفي الغالب الطرف التاني برضه بيعمل اللي في وسعه لكن علشان يبعد؛ علشان كده حاول بقدر الإمكان تعمل ريجيم من العلاقات اللي ممكن تتعبك أنت قدام مش معنى كده بقولك متبقاش اجتماعي بالعكس الإنسان أساسًا مخلوق اجتماعي بس كل اللي أقصده خلي بالك من التعلق بالناس اللي ممكن يسيبوك في أي لحظة وتتعب بسبب تعلقك الزيادة بيهم.
2- حاول بقدر الإمكان أنك تفضفض بس تفضفض لحد يكون محل ثقة على رأي "بدرية طلبة " في فيلم لا تراجع ولا استسلام إحنا محتاجين حد محل ثقة بس علشان نفضفضله بس خلي بالك إن ممكن لما بتحكي بزيادة ده ممكن يضرك فخلي بالك من النقطة دي كويس أوي.
3- اقطع علاقتك باللي بيقولك معلش أكتر كلمة بتخنقني في الحياة كلمة معلش تقعد تحكي للي قدامك ساعة وفي الآخر يقولك معلش ؛ مش عارف والله لولا معلش بتاعته دي كنت ارتحت إزاي في حياتي؟؟
4- متستناش حد يطبطب عليك وحاول دايمًا ترمي حمولك على ربنا لأن دايمًا اللي هتحكيله هيقولك ربنا يعينك طب ما تختصر السكة من الأول وتحكي لربك اللي فعلًا هيعينك.
5- اتعلم أن لكل شيء تحت السموات وقتا أنا كنت فقدت الأمل في أني أخس كيلو واحد لكن لما ربنا أشاء بعتلي الدكتور فادي مكرم اللي قدر وما زال بيحقق المعجزة دي في أني أخس وأقدر أتحرك زي ما كنت بحلم ويمكن أكتر من اللي كنت بحلم بيه علشان كده ثق بأن ربنا هيحققلك اللي نفسك فيه ويمكن الأحسن لكن في الوقت المناسب لإرادته لذلك اتعلم دايمًا تقول لتكن إرادتك ومشيئتك.
6- حاول دايمًا تبعد عن النقاشات اللي صدقني مش هتكسب منها غير وجع راسك وتمن الأدوية بتاعة الصداع فحاول بقدر الإمكان تبعد عن مجادلات الحمقى وافتكر دايمًا لا تجادل الأحمق فقد يخطئ الناس في التفريق بينكما فحاول دايمًا تقلل من المناقشات اللي بتدور نحو إنت عملت كده ليه أو قولت كده ليه.
7- خلاص طالما 2015 خلصت حاول تنساها بحلوها ومرها وتركز في اللي أنت داخل عليه في 2016 عارف إنه إحنا دايمًا بنعشق النكد ونتعلق بالماضي ونقول أصلا لو كنا عملنا كذا مكنش حصل كذا طب ما كويس أنك اتعلمت علشان لو مريت بنفس التجربة تعرف كان إيه الصح اللي المفروض يتعمل.
8- ابعد عن "أبو نضارة" سودة في الحياة واللي بيبقوا ماشيين في الحياة بمبدأ ابتسم سنموت بعد قليل ؛ لأن الناس دي كفيلة تنقلك طاقة سلبية أنت في غنى عنها في بداية السنة أو طول عمرك بمعنى أدق وافتكر أكثم بن الصيفي لما قال خطبته الشهيرة أمام كسرى ملك الفرس؛ "حسبك من الشر سماعه" يعني أصلًا كفاية أنك لما بتسمعه بتتعدى فحاول بقدر الإمكان تبعد عن الناس اللي زي دي وادع إن ربك يخليها سنة حلوة علينا ولنبدأ بدءًا حسنًا.
twitter.com/PaulaWagih
