سجن الماضي التام‏

من أكبر الخدع اللي بيخدع بيها الإنسان نفسه تملي هي أنه فاهم نفسه وأن ممكن حدث صغير ربما مدته متعديش الدقيقة ممكن تخليه ينكد طول اليوم ويقولك أهو اليوم باظ.

ممكن تقول إن كلامي غلط بس تعال نفكر فيها سوا؛ لما أنت بتكون نازل الصبح وقابلت شخصا ممكن يكون ما بينك وبينه خلافات أو مشاكل أو حتى مش متقبله بيبقى لو حصلك أي حاجة يا عيني بيبقى هو المتهم الرئيسي وهو السبب وهو الفقر اللي حل على يومك أو حتى قراءة الأبراج ده لو أنت فتحت بس وقريت برجك اليوم ولقيته بيقولك اليوم سيئ تلقائي بتؤمن أنك لو خرجت ح يحصلك حاجة.

طب إيه العلاقة بين مثلًا الدقيقة اللي شوفت الشخص ده فيها أو قريت برجك اليوم فيها بباقي الـ1939 دقيقة الباقيين في اليوم ؟! حدث مر وخلص ابتدى عيش بعديه متفكرش في أي حاجة ممكن تعكنن عليك اليوم واتعلم دايمًا أنك تاخد كل موقف أو حدث في اليوم طالما انتهى متربطوش بالأحداث اللي بعديه.

اليوم عبارة عن 86400 ثانية الموقف أخد 60 ثانية ما زال متبقيا في اليوم 86340 ثانية يبقى حرام متستغلش الوقت المتبقي ده كله أنك متحققش فيه حاجات مفيدة في حياتك سواء على مستوى العمل أو العلاقات علشان حدث حصل وانتهى.

في الإنجلش في قاعدة اسمها الــ(Past Perfect ) الماضي التام.. لما درسنا القاعدة دي لأول مرة قال لنا المدرس إنها قاعدة الحدث اللي حصل وأخد وقت وانتهى على عكس الـ(Past continuous) الماضي المستمر اللي هو حدث في الماضي وما زال مستمرا في الحاضر ويمكن يكمل معانا في المستقبل.

مشكلتنا دايمًا بنخلي الأحداث السيئة في يومنا ماضي مستمر وتفضل شماعة لأي حاجة وحشة تحصلنا في اليوم تاني والحاجات الحلوة اللي بتدينا قوة دافعة علشان نكمل بنخليها ماضي تام حدثت وانتهت بالرغم إنك لازم تخلي الحاجات السيئة هي الـماضي التام والحاجات الحلوة بس هي الماضي المستمر علشان تقدر تكمل وتخلي الحاجات الحلوة دي بدل ما تكون ماضي ماضي مستمر لا كمان تبقى مضارع في كل وقت ويبقى مستمر كمان في المستقبل متخليش حاجة تعكننك أو تعطلك عن حياتك واستمر ومتوقفش.
www.facebook.com/PaulaWagihofficial