بالفيديو.. والدة متهم: "الظابط قاللى أنا أخذت ابنك خروف وسلمته خروف"

قالت أم سيد والدة أحد المقبوض عليهم في المرج من قبل قوات الشرطة بعد أن أبلغ عنه شخص بأنه يقوم بتصنيع أسلحة في المنزل: "أنا صحيت على صوت المباحث وهما طالعين بيجروا على السلم، سألتهم في إيه في إيه؟، قالولى خليكى خليكى حاجة بسيطة وطالعين".

وعند سؤالها عن عثور قوات الشرطة على أسلحة عقب تفتشيهم للمنزل قالت: "مشفتش حاجة، المباحث كانت طالعة بأسلحة ونزلوا زى ما طلعوا بأسلحتهم وخدوا ابنى معاهم، ولما سألتهم واخدين ابني ليه؟؛ قالولى متخفيش هنرجعلك بسرعة وابنى مقبوض عليه من 7 سبتمبر السنة اللى فاتت ولسة مرجعش".

واتهمت أم سيد ضباط قسم المرج بتلفيق التهمة لابنها قائلة "ابنى ملقوش عنده سلاح، الضباط قالولى مرشدين بلغوا عن ابنك هما فين المرشدين دول؟ ملقوش سلاح عنده ولا في البيت ولا في المحل اللى بيشتغل فيه وكل ما أروح المحاكمة يدوله تجديد 45 يوم في 45 يوم".

وأضافت أن أحد ضباط قسم المرج قد قال لها عندما ذهبت لاستعاطفه: "أنا أخذت ابنك ظلم مبقاش في إديا أنا أخذته خروف وسلمته خروف".