السقا مات

السقّـا مات ولا ما ماتشى
شايِل على ضَهرُه المَحنى قِـربة ميّة
ويخُـش بيوت في حوارى مَـدفونة تَحت الأرض
تِحلَم بالشمس تيجى تزورها وتشوف نورها
شبابيك بِـتسلّّم ع الحارة
تِِسرَق أسرار القاعدين ع القهوة
وتشارِك في رصيف حاضِن نُصّ السِّكة
والنُص التانى للجعانين
والقِربة اللى بتدخُـل بيت الغلبان وتبوس الزير
في الرُكن المزوى ف آخر الحوش
هيّاها القِربة تخش لقصر السُلطان
وبتسقى أكابِـر ومَعالى
ورُتب وعروش
وبتِملا كروش من فيض خيرك
شبابيك عالية
لامسة نجوم السما بإديها
وتمسّى عليها القمراية
وتزورها الشمس
والسقا وضهره هلال مقووس
لسَّـاه بيشيل قِرب الميّة
ويروح للنيل
يِـِملا يوماتى
مالَك يا عجوز... ؟
طول عُـمرَك جار وجاى بالخير
لينا ولِلغير
شاقِق في الأرض الطّين والرّمل
طريق.... أخضر
حاضِـن سما أرضَـك ونجومها
متغَـطّى بقَمرة ليل العشاق
حكاويهم غَـرقانة ف جوفك
أسرارهُــم
مَحفورة ف ضلّة صِـفصاف
صوتها ف حَـضنَـك..
وهموم الناس
دايبة بتِـجرى
وانت الحمّال..وانت الشاهِد
وانت العاشِـق
مليان إحساس
شيبتَـك
ليه بايتة على شطوطَـك ؟
بتعِـدّ اليوم اللى يفوتَـك
وولادك واقفين عاصيينك
مستنيين..لحظة موتَـك
أنا ضَـهرى يموت
لجلن ما أعيش
كُـنت استقوى بعِـزّ شَبابَـك
على ضَـعف ايّـامى
وهمومى بفضيها ف قَـلبَـك
واملا الشّـهد اسقيه للناس
وانا باشرب مُـرّ
وبردو سعيد
ليه دلوقتى باحِـسّ أن انتَ
زيّـى...عَـجوز
فضفَـض مرة وطلّع هَـمّك
نشِّـّف ريق مِـن نَـشِّـّف ريقَـك
زوّد هَـمّك0... وصَـبَغ غمّـك
ولا أقولك......؟
يِـظهر شِبنا انا وانت يا صاحبى
لا انا قادر على شيل القِـربة
ولا حتى الكوز
وانت يا صاحبى ناكرين خيرك
مَـزّعوا أحشاءك يا عجوز
خُـدنى ف حُـضنَـك
نام وارتاح
يِـمكِـن نلقى ف موتنا بَـراح
فَـَـكّ القِـِربة
رماها ع الشَّـط
ودع كل السما والأرض
غَـمَـض عينُـه
فَـرَد دِراعاتُـه
خَـدُه بالحُضن
كروان سارِح
عَـدّى وقال
أموات في احضان الأحياء
أحياء وبيِـحضنوا أموات
ولا تعرف مين فيهم حى..؟
ولا تعرف مين الأموات
كل الناس بتعَـدّى يوماتى
واللى يصَـبّـح واللى يمَـسّى
واللى يقول يا اسمَـر يا جَـميل
دى حكاية واحدة م الحكايات
السّـقّـا اللى سقانا كتير
بقى واحِـد ضِـمن الأموات
النيل حَــّى
هَـيِفضَـل يِـجرى
والسقا هو اللى مات