آخر حوار للساخر جلال عامر فى الذكرى الأولى لرحيله: الإخوان جماعة فاشية تعشق "الملوخية".. مبارك اتعلم فينا سياسة.. ونظيف تخلص من الخنازير وترك البشر
جلال عامر.. كاتب ساخر.. سكندرى معجون بخفة دم غريبة، لم ولن تجدها إلا فى شخصه، وجسده الذى فارق الحياة إلى دار الخلد والبقاء.
كان "عامر" أحد رموز الكتابة الساخرة، وقبل ذلك أحد محررى القنطرة فى أكتوبر 73، فهو أحد قادة الحرب الذى كان مسئولًا عن تسليم 39 جثة إسرائيلية للعدو الصهيونى، وتحديدًا وزير الدفاع شيمون بيريز آنذاك، وهو أيضًا أحد المشاركين فى حرب تحرير الكويت عام 91، وترك الحياة العسكرية وفى جسده إصابات مشرفة.
قابل "عامر" الرئيس السابق مبارك عام 98 ليتسلم ميدالية مقاتلى أكتوبر، لكنه لم يتسلمها حتى وفاته فى العام الماضى، ليؤكد حينها أنه ليس حزينًا على الميدالية، أكثر من ألمه لضياع وقته.
تنشر "فيتو" آخر حوار أجراه الساخر جلال عامر، قبل أيام من الذكرى الأولى لرحيله، والتى توافق الثلاثاء المقبل.
أستاذ جلال حدثنا عن أكتوبر وروحه معك؟
أيام أكتوبر كان الشعب المصرى معبأ، وكل واحد كان يؤدى دوره على أكمل وجه، وأديت دورى فى الفرقة 18 مشاة، وهى الفرقة التى حررت القنطرة شرق، المدينة الوحيدة التى تم تحريرها فى الحرب، وكُلفت بتسليم إسرائيل 39 جثة عبر الأمم المتحدة، وأتذكر أن وزير دفاعهم شيمون بيريز كان فى استقبالى وأنا لم أصافحه فى ذلك اليوم.
وما رأيك فى الحرب التى قادتها حكومة مبارك لسنوات ضد إنفلونزا الخنازير؟
والله الحكومة قدرت على الخنازير ومقدرتش على الإنفلونزا، وهى اتسرعت ودبحت نصف مليون خنزير كانوا يشكلون ثروة لناس غلابة، واللى حصل انهم زودوا من التعرض للمرض لأن الخنازير كانت تأكل القمامة وربنا يستر على الخنازير اللى فاضلين.
عاصرت 3 رؤساء مارأيك فيهم ؟
فيه اختلافات بين التلاتة وعبد الناصر والسادات كانت لهما خلفية سياسية أما مبارك فليس له أاى خلفية سياسية، وهو اتعلم فينا بصراحة والشعب دفع التمن.
حدثنا عن الميدالية التى لم تحصل عليها؟
والله كان اليوبيل الفضى لحرب أكتوبر وربنا كرمنا والرئيس قرر يدينا ميداليات لكن لحد دلوقتى ما اخدتش أى حاجة، والله أعلم ليه؟ وأنا مش زعلان على الميدالية لكن زعلان على الوقت الضايع فى استلامها.
حدثنا عن ترشيحك للانتخابات الرئاسية منذ سنوات؟
نزلت وكان معايا نوال السعداوى وكانت محاولة منا لتغيير الدستور ويا ريتنا ما نزلنا أهم رقعوا الدستور وأقول "كان نفسه فى التغيير وأهو مات ولا اتغير ليه ترفض الدساتير كان بدرى يا صغير".
كيف ترى طلبات الإحاطة فى مجلس الشعب؟
بص هى عاملة زى البطاطا بالظبط بس البطاطا مشوية لكن طلبات الإاحاطة عندنا كلها مسلوقة.
مارأيك فى المواطن المصرى حاليا؟
مغلوب على أمره، والله يكون فى عونه، ومحدش بيصبر زيه وربنا يعديله شدته على خير ويخرج من المحنة.
هل ترى أن مصر من دول عدم الانحياز؟
مصر فى الداخل منحازة للأثرياء ضد الفقراء والغلابة وفى الخارج منحازة مع التوجه الأمريكى فى المنطقة، لكن هى بتحقق الحياد فى القضية الفلسطينية لأنها بتقف مع عباس وبتدعم لبن الأطفال.
ما رأيك فى الانتخابات فى مصر عمومًا؟
بص يا خويا مفيش عندنا أى انتخابات ولا فى أى حاجة اسمها انتخابات وعلى فكرة اللى له حد ميت ووحشه يروح الانتخابات إن شاء الله يلاقيه وأنا نزلت انتخابات الشعب فى دائرة المنشية والحمد لله اتزورت زيها زى غيرها، ومعنديش استعداد أنزل انتخابات تانى وكده أحسن.
مارأيك فى الحزب الوطنى وكيف ترى الفرق بينه وبين الإخوان المسلمين؟
بص الحزب الوطنى أخطر على مصر من القنبلة الذرية التى تم إلقاؤها على هيروشيما عام 1945ليه بقى بالأرقام ضحايا القنبلة 20 ألف بس لكن بص بقى ضحايا الوطنى قد إيه فيه ناس ماتت فى العبارات والقطارات والمبيدات المسرطنة وغيره وده كله لو حسبته حيطلع أكتر من ضحايا القنبلة الذرية وأرض هيروشيما بدأت تتزرع لكن عندنا فى مصر جرفوا الأراضى ومفيش أراضى عندنا تتزرع تانى والحكومة تقودنا من فشل إلى فشل ومن كوارث إلى كوارث والنظام الحالى مدة صلاحيته انتهت من زمان.
وفى مايو فيلم الأيدى الناعمة وفى أكتوبر الرصاصة لا تزال فى جيبى وفى يوليه رد قلبى ونوفمبر مؤتمر الحرب الوطنى وتمر السنوات ومفيش أى حاجة بتحصل وبصراحة مصر بتتأخر بيهم، أما الإخوان فهم جماعة فاشية دموية تعشق الفتة والملوخية، الفرق بينها وبين مبارك الدقن وعندهم استعداد يتحدون مع شياطين العالم حتى تتحقق مصالحهم.
استاذ جلال، لك وجهة نظر فى محافظى الإسكندرية حدثنا عنها؟
الله يرحمه نابليون بونابرت لما مسك السيد محمد كريم محافظ المدينة وطلب فدية علشان يسيبه لكن الشعب السكندرى لم يدفع وقتها فتم إعدامه ومن يومها بييجى المحافظ من دول ينتبه للكورنيش لأن الكورنيش الحتة اللى بييجى منها نابليون على طول وبص والله مفيش أحسن من المحافظ الجلد اللى بتتباع فى السوق.
لماذا اتهمت رجال الأعمال أنهم كسروا أنف أبوالهول؟
لأنه كان بيشم ريحة وحشة قوى وكانت ريحة فساد عشان كده كسروا أنفه حتى لا يقول "إف".
هل ترى أن المجتمع المصرى فى قمة انحداره؟
آه مصر والمصريين حالهم يصعب على الكافر ولو مشينا على كده حييجى يوم يحاكموا فيه الشرفاء، واللى مابيسرقش ممكن يبقى مجرم ويقولك ده فلان ده ما بيسرقش ليه، لكن الناس اللى شغالة سرقة هيتقال عليهم شرفا والحكومة غيرت القيم وعندنا تدين شكلى يهتم بالسواك والنقاب ولا يهتم بالأاخلاق الحميدة وعندنا ربع مساجد العالم ونصف لصوص الكرة الأرضية.
عملت فترة فى صحيفة الأهرام لماذا تركتها؟
تركتها بعد حملة شنها صحفيو روزاليوسف على اعتبار أننى معارض وازاى أكتب فى الأهرام، وربنا يقوى الجميع.
هل ترى أن مصر قادرة على عمل مشروع نووى؟
بص سيادتك لما اتوفت الست أم كلثوم الله يرحمها ويحسن إليها كنا نعارض هدم الفيلل الخاصة بها وفى الآخر توصلوا لحل وسط عملوا عمارة وادونا الدور الأخير بقى متحف الست فوق السطوح وبرضه أنا اقترح أن الحل ده يطبق فى الضبعة يدوا المستثمرين الأرض يبنوا عليها منتجعات، وفوق السطوح يعملوا مفاعل نووى وربنا معاهم.
