تصريحات "المسحول" تثير غضب النشطاء.."حماده" هاشتاج على "تويتر"..إنجى: زعلانة علشان خوفك.. عزيز: الموت ولا المذلة.. سارة: يبدو أنه لم يرَ التغطية المباشرة.. ريكو: محدش يلومه على ضعفه إحنا مجبناش حق حد

حالة من الغضب الشديد انتابت النشطاء السياسيين ونشطاء تويتر بعد أن شاهدوا حمادة صابر, المسحول بالأمس أمام الاتحادية من قبل رجال الأمن، وهو يعترف أن الثوار هم الذين قاموا بتعريته وليست الشرطة, وانقسم النشطاء ما بين ساخر وغاضب على تصريحات بطل واقعة السحل, وقاموا بتدشين هاشتاج باسم "حمادة" للتعبير عن غضبهم .

قالت إنجى حمدى، المتحدثة الإعلامية لـ6 إبريل: "ملعون الــخــوف اللــى يـمحى الكرامة, حمادة زعلانة عليك مش زعلانة منك, زعلانة عشان خوفك أقوى من كرامتك, عشان بنحاول نحرركم وأنتم مسجونين فى خوفكم، بس برضه اللى حصلك فضح مرسى وداخليته".

وأضاف الناشط السياسى عزيز الشافعى: "الحل فى الشارع، والموت ولا المذلة.. بتكلم عن نفسى وماليش دعوة بغيرى".
وتضيف سارة إبراموا: "حمادة لما يشوف الفيديو اللى العالم كله شافو حقيقى هيندهش.. هو من الواضح إن حمادة مشفش التغطية المباشرة اللى العالم كله شافها".

وقال أحمد عاطف : "أغلب الظن إن اللى اتسحل واتعرى فى الشارع حمادة، اللى طلع قال فى الإعلام "أنا كويس" ده حمادة تانى خالص".
وأضاف زار بوب: "طيب الحمد لله إنك يا حمادة اتصورت فيديو.. عشان الشعب لما يشوف أقوالك مع المشهد ويقارن يعرف".

أما بسمة أبو القاسم فقالت: "موقف المواطن حمادة فكرنى بمقولة الراحل جلال عامر: لو شوفت ظابط أمن الدولة بيكهرب ابنى..هقول إنه كان فاصل شحن".
ويضيف عمر عبد الحليم: "أما إنك حمادة صحيح.. مانتا لو راجل كنت ثبت على موقفك وقلت إن الداخلية هددتك!!".

وتستطرد نهال جيمى: "مش عشان الراجل اللى اتسحل إمبارح باع قضيته إننا نتخلى عنه؛ لأننا فى الأساس ماكناش بندافع عن شخصه.. إحنا بندافع عن مبدأ احترام الآدمية".
ويقول وائل محمد: "أعتقد إن الداخلية عرضت على حمادة وظيفة ومبلغ مالى وعلاج على نفقة الدولة، ولم توجه له أى تهديد، وهذا ماجعله يدلى بهذا الاعتراف العجيب".

ويقول عبد الحافظ سعد "شقيق حمادة| - المسحول: "أخويا اتعرض لضغوط من الأمن وتهديد.. والناس فى بلدنا فى الصعيد مولعين من الكلام بتاعه".
ويطالب ريكو: "محدش يلوم حمادة على ضعفه علشان إحنا أضعف منه وماجبناش حق حد من اللى ماتوا علشان نجيب حقه، ولا نقدر نحميه وهو عندهم لسه بيتسحل ويتعذب" .

وأضاف مؤمن ممدوح حسب: "حمادة اتسحل واتعرى واتضرب، وبعدين اتهدد واتشتم.. ناقص يتهزق هنا على تويتر ويتكتب اسمه فى موسوعة الأرقام القياسية".
ويضيف باسم أسعد: "إنت فعلا متعرتش إمبارح بإيد الداخلية, بس للأسف إنت النهاردة جيت وعريت نفسك بإيدك"  .
وقال خالد سويف: "الراجل المسحول على مصر ٢٥ طلع حمادة، ربنا يتولانا ويتولاه بقى".
أما محمد العزونى فيقول: "حمادة قال إن محدش ضربه، وفتحية بتشكر الشرطة والوزارة، فى المواقف اللى زى دى الواحد يقول إيه؟".  
وأضاف ياسر سيف: "وسيذكر التاريخ إن داخلية مبارك قالت: إن الثوار كلهم متعاطين للترامادول، وداخلية مرسى أثبتت إن الشعب المصرى بأكمله متعاطى لنفس العقار".
وسخر محمد حسن قائلًا: "أنا اللى قفايا خبط فى إيد الظابط يا بيه! ده أحلى تعليق على كلام حمادة اللى اتسحل امبارح".
وقال أحمد صالح: "هو حمادة صابر عارف إنه اتصور ومصر كلها شافته؟ حمادة.. إنت مدرك إن الشعب نام بيلعن بعضه بسببك؟ والداخلية كمان مش عارفه تظبتها.. ده الوزير بيعتذر" .