الوزير المسطول يسأل عن المسحول !!
علمت "هريدى نيوز" أن تجار المخدرات أغرقوا السوق المصرية بنوع جديد من المخدر يخلى العقل يطق وبيعمل تهيئات للى يتعاطاه، وقالت مصادر لمحررنا إن وزارة الداخلية ألقت القبض على كبير المهربين وكان معاه لفة واحدة، عرضتها القوة على وزير الداخلية محمد إبراهيم الثانى فشم اللفة واللى جالو.. جالو.. الوزير مسك المنديل وهاتك يا عياط.. والناس تسكت فيه وهو يعيط.. وجابوا له شيكولاتة ومصاصة وهو يعيط.. وفى الآخر آل إيه الناس الوحشين جردوا الراجل من هدومه قدام الاتحادية والعسكر اللى قلوبهم مليانة حنية قلوب ناعمة وقوية، هم اللى بيستروا الراجل والراجل دماغه ناشفة مش عايز يتستر، والإعلام فاكر اللى اتصور ده حقيقة دا كان الكاميرا الخفية، وقال كمان إن كلامه لو غلط يستقيل، فسأله محررنا فين الاستقالة.. فرد عليه الوزير وفين المسحول ؟!
